കോഴിക്കോട്: ഓടുന്ന ട്രെയിനില് നിന്ന് യുവാവിനെ തള്ളിയിട്ട് കൊലപ്പെടുത്തിയ സഹയാത്രികന് അറസ്റ്റില്. തമിഴ്നാട് ശിവഗംഗ സ്വദേശി സോനു മുത്തു (48) ആണ് പിടിയിലായത്. മംഗളൂരു – തിരുവനന്തപുരം മലബാര് എക്സ്പ്രസില് ഞായറാഴ്ച രാത്രിയായിരുന്നു സംഭവം.
മുപ്പത് വയസ് തോന്നിക്കുന്ന അജ്ഞാതനെയാണ് കൊയിലാണ്ടി – വടകര സ്റ്റേഷനുകള്ക്കിടയിലുള്ള ആനക്കുളം റെയില്വേ ട്രാക്കില് മരിച്ച നിലയില് കണ്ടെത്തിയത്. കൊല്ലപ്പെട്ട യുവാവും സോനു മുത്തുവും ട്രെയിനില് വച്ച് തര്ക്കിക്കുന്നതിന്റെ വീഡിയോ പുറത്തുവന്നിട്ടുണ്ട്. വാക്കുതര്ക്കത്തിന് പിന്നാലെ പ്രതി യുവാവിനെ ട്രെയിനില് നിന്ന് തള്ളിയിടുകയായിരുന്നു. മറ്റൊരു യാത്രക്കാരനാണ് വീഡിയോ പകര്ത്തിയത്.
കൊല്ലപ്പെട്ടയാളും പ്രതിയും തമ്മില് മുന്പരിചയമില്ലായിരുന്നുവെന്നാണ് വിവരം. എന്തോ വീഡിയോ എടുത്തതുമായി ബന്ധപ്പെട്ടുണ്ടായ തര്ക്കമാണ് കൊലപാതകത്തില് കലാശിച്ചതെന്നാണ് വിവരം. ഞായറാഴ്ച രാത്രി പതിനൊന്നുമണിയോടെയാണ് യുവാവ് പാളത്തില് വീണുകിടക്കുന്നത് പരിസരവാസികള് കണ്ടത്. മൃതദേഹം മെഡിക്കല് കോളേജിലെ മോര്ച്ചറിയില് സൂക്ഷിച്ചിരിക്കുകയാണ്.
