ആലുവ: മലയാളി ഹോട്ടലുടമയുടെ പേരില്‍ വ്യാജ രേഖകളുണ്ടാക്കി ബംഗാളി രണ്ടു കോടിയുടെ ജി എസ് ടി തട്ടിപ്പ് നടത്തി. എറണാകുളത്ത് ഇടയാറിനടുത്ത് ബിനാനിപുരത്ത് ഹോട്ടല്‍ നടത്തുന്ന സജി എന്നയാളുടെ പേരില്‍ വ്യാജ രേഖകളുണ്ടാക്കിയാണ് രണ്ടു കോടിയുടെ ജിഎസ്ടി വെട്ടിപ്പ് നടത്തിയത്.
ഒടുവില്‍ കൊല്‍ക്കത്തയിലെ ഫ്ളാറ്റില്‍ നിന്നും ബംഗാളിയായ സഞ്ജയ് സിംഗ് (43) എന്ന തട്ടിപ്പുവീരനെ ആലുവ സൈബര്‍ പോലീസ് സ്റ്റേഷന്‍ ടീം സാഹസികമായാണ് അറസ്റ്റ് ചെയ്തത്.
ഹോട്ടലുടമ സജിയുടെ പേരില്‍ രണ്ട് കമ്പനികളാണ് ഇയാള്‍ വ്യാജമായി രജിസ്റ്റര്‍ ചെയ്തത്.ഇതിനായി സജിയുടെ ആധാര്‍ കാര്‍ഡ്, പാന്‍ കാര്‍ഡ്, കെ.എസ്.ഇ.ബി ബില്ലുകള്‍ എന്നിവ ഉപയോഗിച്ചിരുന്നു. അതിന് ശേഷം ഈ കമ്പനികളുടെ ജി.എസ്.ടി ബില്ലുകള്‍ ഉപയോഗിച്ച് രണ്ടുകോടിയുടെ ജി എസ് ടി തട്ടിപ്പ് നടത്തിയതായാണ് പൊലീസ് പറയുന്നത്. പണ്ട് ഓണ്‍ലൈന്‍ വായ്‌പ എടുക്കുന്നതിന് സജി ആധാര്‍ കാര്‍ഡ്, പാന്‍ കാര്‍ഡ്, കെ.എസ്.ഇ.ബി ബില്ലുകള്‍ എന്നിവ സമര്‍പ്പിച്ചിരുന്നു. ഈ രേഖകളായിരിക്കാം തട്ടിപ്പുസംഘം വ്യാജ രേഖകള്‍ ഉണ്ടാക്കുന്നതിന് ഉപയോഗിച്ചതെന്ന് കരുതുന്നു. സജിയുടെ പേരില്‍ രജിസ്റ്റര്‍ ചെയ്ത രണ്ട് കമ്പനിയുമായി വിപണനം നടത്തിയെന്ന് പറയുന്ന മറ്റു കമ്പനികളും കടലാസ് കമ്പനികള്‍ മാത്രമാണെന്ന് തെളിഞ്ഞു. സജിയുടെ കമ്പനികളുമായി ഇടപാടുകള്‍ നടത്തിയ ആറു കമ്പനികള്‍ സഞ്ജയ് സിംഗിന്റെ പേരിലുള്ളതാണ്.
ജിഎസ് ടി ഓഫീസില്‍ നിന്നും രണ്ടുകോടിയുടെ ജിഎസ് ടി തട്ടിപ്പ് നടത്തിയതിന് സജിയുടെ പേരില്‍ നോട്ടീസ് വന്നപ്പോഴാണ് തട്ടിപ്പ് തിരിച്ചറിഞ്ഞത്. ഉടനെ ബിനാനിപുരം സേറ്റഷനില്‍ സജി പരാതി നല്‍കി. ജില്ലാ പോലീസ് മേധാവി വിശദമായ അന്വേഷണത്തിന് ഉത്തരവിട്ടു. തുടര്‍ന്ന് കേസ് സൈബര്‍ പോലീസ് സ്റ്റേഷനിലേക്ക് കൈമാറി. എസ്.പി.വിവേക് കുമാറിന്റെ മേല്‍നോട്ടത്തില്‍ സൈബര്‍ പോലീസ് സ്റ്റേഷനില്‍ പ്രത്യേക ടീം രൂപീകരിച്ച് നടത്തിയ അന്വേഷണത്തില്‍ കൊല്‍ക്കത്തയിലെ ഫ്ളാറ്റില്‍ നിന്നും സജ്ഞയ് സിംഗിനെ സാഹസികമായി പിടികൂടയിത്. ആലുവ സൈബര്‍ പോലീസ് സ്റ്റേഷന്‍ ടീം ആണ് അറസ്റ്റ് ചെയ്തത്.
ഇന്‍സ്‌പെക്ടര്‍മാരായ എം.ബി.ലത്തീഫ്, കെ.ആര്‍.മോഹന്‍ദാസ്, എസ്.ഐ ടി.എം.സൂഫി , സീനിയര്‍ സിവില്‍ പോലീസ് ഓഫീസര്‍മാരായ പി.എം.തല്‍ഹത്ത്, ശ്യം കുമാര്‍, രതീഷ്, സുഭാഷ് തുടങ്ങിയവര്‍ അന്വേഷണ സംഘത്തിലുണ്ടായിരുന്നു.
