തിരുവനന്തപുരം: മലയാള സിനിമയില് അത്ഭുതവിജയമായി മാറുകയാണ് ഉണ്ണി മുകുന്ദന് നായകനായ ‘മാളികപ്പുറം’. ചിത്രം നൂറ് കോടി ക്ലബ്ബില് ഇടംപിടിച്ചതോടെ ഉണ്ണിയുടെ സിനിമാ ജീവിതത്തിലെ ഏറ്റവും വലിയ ഹിറ്റ് ചിത്രമായി മാറി ഭക്തിപരിസരത്തില് ഒരുക്കിയ മാളികപ്പുറം. സിനിമയുടെ ആഗോള കലക്ഷനില് നൂറ് കോടി പിന്നിട്ടു എന്ന് ഉണ്ണി മുകുന്ദന് അടക്കം അണിയറ പ്രവര്ത്തകര് വെളിപ്പെടുത്തി. ചിത്രം റിലീസയി നാല്പത് ദിവസം കൊണ്ടാണ് ചിത്രം നൂറ് കോടി ക്ലബ്ബില് ഇടംപിടിച്ചത്. സമീപകാല മലയാള സിനിമയിലെ ശ്രദ്ധേയ വിജയങ്ങളില് ഒന്നാവുകയാണ് മാളികപ്പുറം. 2022 ലെ അവസാന റിലീസുകളില് ഒന്നായി ഡിസംബര് 30 ന് തിയറ്ററുകളിലെത്തിയ ചിത്രം ഒന്നര മാസം പിന്നിടുമ്പോഴും മികച്ച പ്രതികരണമാണ് തിയറ്ററുകളില് നിന്നും ലഭിക്കുന്നത്.
മൂന്നര കോടി ബജറ്റിലെത്തിയ ചിത്രമാണ് 100 കോടി ക്ലബ്ബില് എത്തി നില്ക്കുന്നത്. ഉണ്ണി മുകുന്ദന്റെ ആദ്യ 100 കോടി ക്ലബ്ബ് ചിത്രമാണിത്. വിദേശ രാജ്യങ്ങളിലും മികച്ച പ്രതികരണമാണ് ചിത്രത്തിന് ലഭിച്ചത്. കേരളത്തിനു പുറത്ത് ബെംഗളൂര്, മുംബൈ, ഡല്ഹി എന്നിവടങ്ങളിലും ആളുകള് സിനിമ ഏറ്റെടുത്തു. ഡിസംബര് 30 ന് കേരളത്തിലെ തിയറ്ററുകളില് റിലീസ് ചെയ്ത ചിത്രത്തിന് ആദ്യ ദിവസങ്ങളില് തന്നെ വലിയ പ്രതികരണമാണ് ലഭിച്ചത്. ചിത്രത്തിന് കുടുംബ പ്രേക്ഷകരും ധാരാളമായി എത്തി. ജിസിസി, യുഎഇ റിലീസ് ജനുവരി 5 നും കേരളമൊഴികെ ഇന്ത്യയിലെ മറ്റു സെന്ററുകളിലെ റിലീസ് 6 നും ആയിരുന്നു. പല വിദേശ മാര്ക്കറ്റുകളിലേക്കും ചിത്രം പിന്നാലെയെത്തി.രണ്ടാം വാരത്തില് കേരളത്തിലെ സ്ക്രീന് കൗണ്ട് വര്ധിപ്പിക്കുകയും ചെയ്തിരുന്നു ചിത്രം.
140 തിയറ്ററുകളിലായിരുന്നു റിലീസ് ചെയ്തിരുന്നതെങ്കില് രണ്ടാം വാരത്തിലേക്ക് കടന്നപ്പോള് 170 സ്ക്രീനുകളിലായി ചിത്രത്തിന്റെ പ്രദര്ശനം. സൂപ്പര്താരങ്ങളായ അജിത്തിന്റെയും വിജയയുടെയും ചിത്രങ്ങള് കേരളത്തിലെ തിയറ്ററുകള് കീഴടക്കിയിട്ടും മാളികപ്പുറം കുലുങ്ങിയില്ല. വീണ്ടും അതിശക്തമായി ചിത്രം തിരിച്ചെത്തി. ചിത്രത്തിന്റെ ഡബ്ബിങ് പതിപ്പ് മറ്റ് സംസ്ഥാനങ്ങളിലും റിലീസ് ചെയ്തിരുന്നു. തെലുങ്ക് സൂപ്പര് സ്റ്റാര് അല്ലു അര്ജുന്റെ കമ്പനിയായ ഗീതാ ആര്ട്സാണ് തെലുങ്ക് പതിപ്പിന്റെ വിതരണാവകാശം നേടിയത്.
ചിത്രം ജനുവരി 26 ന് റിലീസ് ചെയ്തു. ഉണ്ണി മുകുന്ദന് തെലുങ്ക് പ്രേക്ഷകര്ക്കിടയിലുള്ള സ്വീകാര്യതയും മാളികപ്പുറത്തിന് അനുകൂലമായി. തെലുങ്കിന് പുറമെ തമിഴ്, കന്നഡ ഭാഷകളിലും ചിത്രം റിലീസ് ചെയ്തു.അഭിലാഷ് പിള്ള തിരക്കഥയെഴുതി വിഷ്ണു ശശിശങ്കര് സംവിധാനം ചെയ്ത ചിത്രമാണ് മാളികപ്പുറം. സിനിമയുടെ വിജയം അയ്യപ്പസ്വാമിക്കാണ് ഉണ്ണി മുകുന്ദന് സമര്പ്പിക്കുന്നത്. ‘നന്ദി. സന്തോഷം. അഭിമാനം. ഈ സിനിമയെ ഹൃദയത്തോട് ചേര്ത്ത് സ്നേഹിച്ചതിന് ഒരുപാട് നന്ദി. എല്ലാ കുടുംബാംഗങ്ങളോടും കുട്ടികളോടും കൂട്ടുകാരോടും പറഞ്ഞാല് തീരാത്ത നന്ദിയും കടപ്പാടും. അയ്യപ്പാ..മാളികപ്പുറം സിനിമയിലെ മുന്നിലും പിന്നിലും പ്രവര്ത്തിച്ച എല്ലാവര്ക്കും ആശംസകള് നേരുന്നു’ എന്നാണ് സന്തോഷം പങ്കുവെച്ച് ഉണ്ണി മുകുന്ദന് സോഷ്യല് മീഡിയയില് കുറിച്ചത്.
