കൊല്ലം : മലയാളത്തിലെ യുവ സംവിധായിക നയന സൂര്യന്റെ മരണവുമായി ബന്ധപ്പെട്ടുള്ള വിശദ വിവരങ്ങള് പോലീസ് അന്വേഷിച്ചില്ലെന്ന് വിശദാംശങ്ങളുമായി കുടുംബം. നയനയുടെ മരണത്തിലെ അസ്വഭാവികത അന്വേഷിക്കുന്നതിനായി പുതിയ സംഘം ഇന്ന് ചുമതലയേറ്റെടുക്കാനിരിക്കേയാണ് കുടുംബം പോലീസിനെതിരെ രംഗത്ത് എത്തിയിരിക്കുന്നത്.
പോസ്റ്റുമോര്ട്ടം റിപ്പോര്ട്ടില് നയനയുടെ ശരീരത്തിലെ പാടുകളെ കുറിച്ച് പരാമര്ശിച്ചിരുന്നു. എന്നാല് ഇക്കാര്യമൊന്നും അറിയിച്ചില്ല. മരണത്തില് അസ്വാഭാവികത ഇല്ലെന്ന് പറഞ്ഞു പോലീസ് വിശ്വസിപ്പിച്ചെന്നും കുടുംബം ആരോപിച്ചു. 2019-ല് നയന മരിച്ചതിന് പിന്നാലെ അസ്വാഭാവിക മരണത്തിന് മ്യൂസിയം പോലീസ് കേസെടുത്തിരുന്നു. എന്നാല് ദുരൂഹതയൊന്നുമില്ലെന്നായിരുന്നു കുടുംബത്തെ അറിയിച്ചിരുന്നത്. നയന ഷുഗര് രോഗിയായതിനാല് ഇതാണ് മരണത്തിലേക്ക് നയിച്ചതെന്ും കുടുംബം വിശ്വസിച്ചത്.
നയന മരിച്ച് കുറച്ചു ദിവസം കഴിഞ്ഞ് പോസ്റ്റ്മോര്ട്ടം റിപ്പോര്ട്ട് കുടുംബത്തിന് കിട്ടിയിരുന്നു. പോലീസ് പറഞ്ഞത് വിശ്വസിച്ചിരുന്നതിനാല് ഇത് വായിച്ചു പോലും നോക്കിയിരുന്നില്ല. പിന്നീട് നയനയുടെ ചില സുഹൃത്തുക്കള് പോസ്റ്റുമോര്ട്ടം റിപ്പോര്ട്ടിലെ വിവരങ്ങള് പുറത്തുവിട്ടതോടെയാണ് കുടുംബം ഇക്കാര്യങ്ങള് അറിയുന്നത്. നയനയുടെ കഴുത്ത് ശക്തമായി ഞെരിഞ്ഞിരുന്നുവെന്നും അടിവയറ്റില് ചവിട്ടേറ്റ് ആന്തരികാവയവങ്ങളുടെ പ്രവര്ത്തനങ്ങള് തകരാറിലായെന്നും പോസ്റ്റുമോര്ട്ടം റിപ്പോര്ട്ടിലുണ്ടായിരുന്നു.
എന്നാല് ദുരൂഹമായ ഈ പരിക്കുകളെക്കുറിച്ച് അന്വേഷിക്കാതെ പോലീസ് അതിവേഗം കേസ് അന്വേഷണം അവസാനിപ്പിക്കുകയായിരുന്നു. സംഭവത്തില് വിശദമായ അന്വേഷണം നടത്തണമെന്നും നയനയുടെ സഹോദരങ്ങള് ആവശ്യപ്പെട്ടു. 2019 ഫെബ്രുവരി 24 നാണ് തിരുവനന്തപുരം ആല്ത്തറയിലെ വാടക വീട്ടില് നയനയെ മരിച്ച നിലയില് കണ്ടെത്തിയത്.
