കാസര്‍കോഡ് : കാപ്പ ചുമത്തി നാടുകടത്തിയ പ്രതി എംഡിഎംഎയുമായി പോലീസ് പിടിയില്‍. അമ്പലത്തറ സ്വദേശി ബി. റംഷീദാണ് സുഹൃത്തിനൊപ്പം പിടിയിലായത്. പടന്നക്കാട് ദേശീയ പാതയില്‍ പോലീസ് പരിശോധനയ്‌ക്കിടെ റംഷീദിനെ പോലീസ് വളഞ്ഞിട്ട് പിടിക്കുകയായിരുന്നു.
അടിപിടി, കവര്‍ച്ച, മയക്കുമരുന്ന് തുടങ്ങി വിവിധ കേസുകളില്‍ പെട്ട് കാപ്പ പ്രകാരം നാടുകടത്തപ്പെട്ട പ്രതിയാണ് റംഷീദ്. കാസര്‍കോഡ് ജില്ലയില്‍ പ്രവേശിക്കരുതെന്നാണ് റംഷീദിനുള്ള നിര്‍ദ്ദേശം. ഇയാള്‍ ജില്ലയിലേക്ക് വരുന്നുണ്ടെന്ന രഹസ്യ വിവരത്തിന്റെ അടിസ്ഥാനത്തില്‍ പോലീസ് ദേശീയ പരിശോധന നടത്തുകയും ഇയാളെ പിടികൂടുകയുമായിരുന്നു. തുടര്‍ന്ന് നടത്തിയ പരിശോധനയിലാണ് എംഡിഎംഎ കണ്ടെത്തിയത്.
കാഞ്ഞങ്ങാട് ഡിവൈഎസ്പി പി ബാലകൃഷ്ണന്‍ നായരുടെ നേതൃത്വത്തിലുള്ള പോലീസ് സംഘമാണ് റംഷീദിനെ പിടികൂടിയത്. ദേശീയ പാതയിലൂടെ കടന്നുപോയ ബസ് ഉള്‍പ്പടെയുള്ള വാഹനങ്ങളെ തടഞ്ഞിട്ടാണ് റംഷീദ് സഞ്ചരിച്ച വാഹനം മേല്‍പാലത്തില്‍ കുടുക്കിയത്.
റംഷീദിനൊപ്പമുണ്ടായിരുന്ന ടി.എം. സുബൈറിനേയും പിടികൂടി. ഇയാളുടെ ക്രിമിനല്‍ പശ്ചാത്തലം വ്യക്തമല്ല. വാഹനത്തില്‍ നിന്ന് 1.88 ഗ്രാം എംഡിഎംഎയാണ് കണ്ടെത്തിയത്. റംഷീദിനെ സഹായിച്ചതിനും വാഹനത്തില്‍ നിന്ന് മയക്കുമരുന്ന് കണ്ടെത്തിയതിലും സുബൈറിനെതിരെ കേസെടുത്തിട്ടുണ്ട്. പിടികൂടിയ ഇരുവരേയും കോടതിയില്‍ ഹാജരാക്കും.
