തിരുവനന്തപുരം : ബഫര്‍സോണിനെതിരെയുള്ള പ്രതിഷേധങ്ങള്‍ കടുത്തതോടെ കര്‍ദ്ദിനാള്‍ ക്ലിമ്മിസുമായി കൂടിക്കാഴ്ച നടത്തി സര്‍ക്കാര്‍. പ്രതിഷേധം തണുപ്പിക്കാനുള്ള നീക്കത്തിന്റെ ഭാഗമായാണ് ഈ കൂടിക്കാഴ്ച. മന്ത്രിമാരായ ആന്റണി രാജു, റോഷി അഗസ്റ്റിന്‍ എന്നിവരാണ് കര്‍ദ്ദിനാള്‍ ക്ലിമ്മിസിനെ കാണുന്നത്.
ബഫര്‍സോണ്‍ വിഷയത്തിലെ ആശങ്കകള്‍ പരിഹരിക്കണമെന്നും വിദഗ്ധ സിമിതിയെക്കൊണ്ട് പഠനം നടത്തണമെന്നും ആവശ്യപ്പെട്ട് അതിരൂപതകള്‍ രംഗത്തെത്തിയതോടെ കര്‍ദ്ദിനാള്‍ ക്ലിമ്മിസിനെ ഇറക്കി സഭകളെ അനുനയിപ്പിക്കാനാണ് ശ്രമം. ബഫര്‍ സോണ്‍ ആശങ്ക തീര്‍ക്കാനുള്ള തുടര്‍നടപടി സ്വീകരിക്കാന്‍ ഇന്ന് രണ്ട് നിര്‍ണായക യോഗങ്ങള്‍ ചേരാനിരിക്കേയാണ് കൂടിക്കാഴ്ച. വൈകിട്ട് മൂന്നിന് മുഖ്യമന്ത്രി വിളിച്ച ഉന്നതതല യോഗവും സര്‍ക്കാര്‍ നിയോഗിച്ച വിദഗ്ധസമിതിയോഗത്തിലും കര്‍ദ്ദിനാളുമായ കൂടിക്കാഴ്ചയുടെ വിശദാംശങ്ങള്‍ അറിയിക്കും.
സുപ്രീംകോടതിയില്‍ സ്വീകരിക്കേണ്ട സമീപനവും മുഖ്യമന്ത്രി വിളിച്ച യോഗത്തില്‍ ചര്‍ച്ച ചെയ്യും. ഉപഗ്രഹ സര്‍വേ റിപ്പോര്‍ട്ട് സമര്‍പ്പിക്കുന്നതിനൊപ്പം വ്യക്തിഗത വിവരങ്ങള്‍ അടങ്ങിയ ഫീല്‍ഡ് റിപ്പോര്‍ട്ട് നല്‍കാന്‍ അനുവാദവും തേടും. ഫീല്‍ഡ് സര്‍വേ റിപ്പോര്‍ട്ട് സമര്‍പ്പിക്കാനായി സത്യവാങ്മൂലം നല്‍കാനാണ് നീക്കം.
ഇടുക്കി ജില്ലയിലെ ബഫര്‍സോണ്‍ ഉപഗ്രഹ സര്‍വേയിലെ അപാകത കണ്ടെത്താന്‍ വില്ലേജ് ഓഫീസര്‍മാരുടെ നേതൃത്വത്തിലുള്ള പരിശോധന ചൊവ്വാഴ്ച തുടങ്ങും. മാപ്പില്‍ രേഖപ്പെടുത്തിയിരിക്കുന്ന സര്‍വ്വേ നമ്പറുകള്‍ വനാതിര്‍ത്തിയോട് ചേര്‍ന്ന പ്രദേശമാണോ, സംരക്ഷിത വനമേഖലയുടെ അതിര്‍ത്തിയാണോ, ജനസാന്ദ്രത കൂടിയ പ്രദേശമാണോ തുടങ്ങിയവയൊക്കെയാണ് പരിശോധിക്കുക. വില്ലേജ് ഓഫീസര്‍, പഞ്ചായത്ത് സെക്രട്ടറി, ഡിഎഫ്ഒ നിര്‍ദേശിക്കുന്ന വനംവകുപ്പ് ഉദ്യോഗസ്ഥന്‍ തുടങ്ങിയവരുടെ സംഘമാണ് പരിശോധന നടത്തുന്നത്. മൂന്ന് ദിവസത്തിനുള്ളില്‍ പരിശോധന പൂര്‍ത്തിയാക്കി റിപ്പോര്‍ട്ട് നല്‍കണമെന്ന് ജില്ലാ കളക്ടറുടെ നിര്‍ദ്ദേശ പ്രകാരമാണിത്.
