തിരുവനന്തപുരം: ‘ഷെഫീക്കിന്റെ സന്തോഷം’ എന്ന സിനിമയില് അഭിനയിച്ചതിന് പ്രതിഫലം നല്കിയില്ലെന്ന് ഉണ്ണിമുകുന്ദനെതിരെ ആരോപണം ഉയര്ത്തിയ ശേഷം തികച്ചും ഒറ്റപ്പെട്ടിരിക്കുകയാണ് നടന് ബാല. ഒരു ഭാഗത്ത് നിന്നും ബാലയ്ക്ക് പിന്തുണ ലഭിച്ചില്ല. ഷെഫീഖിന്റെ സന്തോഷം എന്ന ചിത്രത്തില് അഭിനയിച്ചവരും അണിയറ പ്രവര്ത്തകരും ഉണ്ണി മുകുന്ദന്റെ നല്ല മനസ്സിനെ പുകഴ്ത്തുകയും ബാലയുടെ നന്ദികേടിനെ വിമര്ശിക്കുകയുമാണ് ചെയ്തത്. ഇതോടെ തല്ക്കാലം കേരളം വിടുകയാണെന്ന പ്രഖ്യാപനം നടത്തിയിരിക്കുകയാണ് ബാല.
കഴിഞ്ഞ ദിവസം ഒരു യുട്യൂബ് ചാനലിന് നല്കിയ അഭിമുഖത്തിലാണ് ബാല ഈ വെളിപ്പെടുത്തല് നടത്തിയത്. “ഞാന് തല്ക്കാലം ചെന്നൈയ്ക്ക് പോവുന്നു. എല്ലാവരും ഒറ്റപ്പെടുത്തി. എല്ലാവരെയും സഹായിക്കാനാണ് ശ്രമിച്ചത്. “- ബാല പറഞ്ഞു.
“ഈ നിമിഷം വരെ ഒരാള് പോലും എന്നെ വിളിച്ചില്ല. മനോജ് കെ ജയന് എന്നെ വിളിച്ചിരുന്നു. നല്ല മനുഷ്യനാണ് അദ്ദേഹം. വലിയ വലിയ ആളുകളൊക്കെ എവിടെപ്പോയി”- നിരാശയോടെ ബാല ചോദിക്കുന്നു.
നേരത്തെ ഉണ്ണി മുകുന്ദന് ബാല നിര്മ്മിക്കുന്ന ഒരു ചിത്രത്തില് പ്രതിഫലം വാങ്ങാതെ അഭിനയിച്ചിരുന്നു. ഞാന് ഉണ്ണി മുകുന്ദന്റെ ഒരു ചിത്രത്തില് പ്രതിഫലം വാങ്ങാതെ അഭിനയിക്കും എന്ന് പറഞ്ഞ് ഉണ്ണി മുകന്ദനെ പുകഴ്ത്തുന്ന ബാലയുടെ ഒരു പഴയ വീഡിയോ കഴിഞ്ഞ ദിവസം ഉണ്ണി മുകുന്ദന് പറത്തുവിട്ടിരുന്നു. ഇതോടെ ബാലയ്ക്ക് ന്യായീകരണങ്ങള് ഇല്ലാതായി.
