എറണാകുളത്ത് റോഡരുകിൽ പശുക്കൾ കൂട്ടത്തോടെ ചത്ത നിലയിൽ; ദാരുണമായ കാഴ്ച അമ്പലമേടിൽ, പുലർച്ചെ വാഹനം ഇടിച്ചതെന്ന് പോലീസ്

കൊച്ചി: എറണാകുളം അമ്പലമേടിൽ പശുക്കൾ കൂട്ടത്തോടെ ചത്ത നിലയിൽ. അഞ്ച് പശുക്കളാണ് ചത്തത്. വാഹനം ഇടിച്ചാണ് പശുക്കൾ ചത്തതെന്നാണ് വിവരം. റോഡരികിൽ നിരനിരയായി പശുക്കൾ ചത്ത നിലയിൽ കിടക്കുകയായിരുന്നു. പുലർച്ചെ അഞ്ചേ മുക്കാലോടെ ഒരു ടോറസ് വാഹനം പശുക്കളെ ഇടിക്കുകയായിരുന്നുവെന്ന് പോലീസ് പറയുന്നു.

എഫ് സി എ കോമ്പൗണ്ടിൽ മേയാനിറങ്ങിയ പശുക്കൾ റോഡിലേക്കിറങ്ങിയപ്പോഴാണ് അപകടം. ഫാക്ടിന്റെ ഉടമസ്ഥതയിലുള്ള കാടുപിടിച്ച് കിടക്കുന്ന 52 ഏക്കർ സ്ഥലത്ത്  പശുക്കൾ ധാരാളമുണ്ട്. വർഷങ്ങളായി ഇവിടെ പെറ്റുപെരുകിയതാണ് ഈ കന്നുകാലികൂട്ടം. ഇവ ഇടയ്‌ക്ക് റോഡിൽ ഇറങ്ങുമ്പോൾ അപകടത്തിൽപ്പെടുന്നത് പതിവാണ്. എന്നാൽ ഇത്രയധികം പശുക്കൾ ഇങ്ങനെ ചാവുന്നത് ആദ്യമാണ്.  

ഇവിടെ നിന്നും പശുക്കളെ ഇറച്ചിയ്‌ക്കായി രഹസ്യമായി പിടിച്ചുകൊണ്ടു പോകുന്നതും പതിവാണ്.