അഹമ്മദാബാദ്: ഗുജറാത്ത് നിയമസഭാ തെരഞ്ഞെടുപ്പിന്റെ ആദ്യഘട്ട വോട്ടെടുപ്പ് തുടങ്ങി. 19 ജില്ലകളിലെ 89 മണ്ഡലങ്ങളാണ് ഇന്ന് പോളിങ്ബൂത്തില്‍ വിധിയെഴുതുന്നത്. ആകെ 788 സ്ഥാനാര്‍ത്ഥികളാണ് മത്സര രംഗത്തുളളത്. സൗരാഷ്‌ട്ര കച്ച് മേഖലകളിലും തെക്കന്‍ ഗുജറാത്തിലുമാണ് ആദ്യഘട്ടത്തില്‍ വോട്ടെടുപ്പ് നടക്കുന്നത്. വന്‍ വിജയം നേടുമെന്ന് പ്രതീക്ഷയിലാണ് ബിജെപി മത്സരരംഗത്തുള്ളത്. നാല് ജില്ലകളില്‍ വൈകിട്ട് അഞ്ചുവരെയാണ് വോട്ടെടുപ്പ് നടക്കുന്നത്. 14,382 പോളിങ്‌സ്‌റ്റേഷനുകളാണുള്ളത്. ഇന്ന് വോട്ടെടുപ്പ് നടക്കുന്ന 89 മണ്ഡലങ്ങളില്‍ 48 ഇടത്ത് 2017ലെ തെരഞ്ഞെടുപ്പില്‍ ബിജെപിയായിരുന്നു മുന്നിലെത്തിയത്. 40 സീറ്റുകളാണ് അന്ന് കോണ്‍ഗ്രസിന് ലഭിച്ചത്, ഒരിടത്ത് സ്വതന്ത്രനും വിജയിച്ചു. കഴിഞ്ഞ തവണത്തേക്കാള്‍ വ്യത്യസ്തമായി ഇത്തവണ എഎപിയും സാന്നിധ്യമായി മത്സരരംഗത്തുണ്ടെന്നതാണ് പ്രത്യേകത. ഡിസംബര്‍ അഞ്ചിനാണ് രണ്ടാം ഘട്ട വോട്ടെടുപ്പ്.
ആംആദ്മി പാര്‍ട്ടിയുടെ മുഖ്യമന്ത്രി സ്ഥാനാര്‍ത്ഥി ഇസുദാന്‍ ഗദ്‌വി മത്സരിക്കുന്ന ഖംബാലിയാണ് ശ്രദ്ധേയമായ മണ്ഡലം. ക്രിക്കറ്റ് താരം രവീന്ദ്ര ജഡേജയുടെ ഭാര്യ റിവാബ ജഡേജ മത്സരിക്കുന്ന ജാംനഗറിലും ഇന്നാണ് വോട്ടെടുപ്പ്. ബിജെപി ടിക്കറ്റിലാണ് റിവാബ മത്സരിക്കുന്നത്.
പ്രതികരിക്കാൻ ഇവിടെ എഴുതുക: