ദോഹ: ചരിത്രമെഴുതി ഓസ്ട്രേലിയ. ലോകകപ്പ് ഫുട്‌ബോളിന്റെ പ്രീ ക്വാര്‍ട്ടറിലേക്ക് ഓസീസിന്റെ മുന്നേറ്റം. ഗ്രൂപ്പ് ഡിയിലെ അവസാന മത്സരത്തില്‍ ഡെന്മാര്‍ക്കിനെ എതിരില്ലാത്ത ഒരു ഗോളിന് കീഴടക്കിയാണ് ഓസമുന്നേറ്റം. ആറ് പോയിന്റോടെ ഗ്രൂപ്പില്‍ രണ്ടാമതാണ് ഓസ്ട്രേലിയ. മാത്യു ലെക്കിയാണ് ഗോള്‍ നേടിയത്.
ജയിക്കാനുറച്ചാണ് ഓസീസും ഡെന്മാര്‍ക്കും കളത്തിലിറങ്ങിയത്. ഇതോടെ, മത്സരം ആവേശകരം. പന്ത് ഇരു ഭാഗത്തേക്കും കയറിയിറങ്ങി. മിക്ക നീക്കങ്ങളും ബോക്‌സില്‍ അവസാനിച്ചു. കൂടുതല്‍ ആക്രമണം സംഘടിപ്പിച്ച ഓസീസിനു തന്നെയായിരുന്നു മുന്‍തൂക്കം. ആദ്യ പകുതി ഗോളടിക്കാതെ അവസാനിച്ചു.
രണ്ടാം പകുതിയില്‍ കളിയുടെ ചുക്കാന്‍ പിടിച്ച ഓസീസ് 60-ാം മിനിറ്റില്‍ ലക്ഷ്യം കണ്ടു. ഹാഫില്‍ നിന്ന് റിലി മക്ഗ്രീ നീട്ടി നല്കിയ പാസ് പിഴവില്ലാതെ ലെക്കി വലയിലെത്തിച്ചു. ഇതിനിടെ, ഗ്രൂപ്പിലെ മറ്റൊരു മത്സരത്തില്‍ ഫ്രാന്‍സിനെതിരെ ടൂണീഷ്യ ലീഡ് നേടിയിരുന്നു. ഇതോടെ, ഓസ്‌ട്രേലിയയ്‌ക്ക് ജയം അനിവാര്യമായി. ഇല്ലെങ്കില്‍ ഒരു സമനില മാത്രമുള്ള ഡെന്മാര്‍ക്കിന് ഒരു പോയിന്റോടെ മടക്കം.
