ന്യൂദല്‍ഹി : ഓസ്‌ട്രേലിയന്‍ യുവതിയെ കൊലപ്പെടുത്തിയ ശേഷം ഇന്ത്യയിലേക്ക് കടന്ന ഇന്ത്യന്‍ യുവാവ് ദല്‍ഹിയില്‍ പിടിയില്‍. ഓസ്‌ട്രേലിയയില്‍ നേഴ്‌സായി ജോലി ചെയ്തിരുന്ന രജ്വീന്ദര്‍ സിങ്ങാണ്(38) ദല്‍ഹി പോലീസിന്റെ പിടിയിലായത്. 10 ലക്ഷം ഓസ്‌ട്രേലിയന്‍ ഡോളര്‍ (5.23 കോടി രൂപയോളം) ഇയാളുടെ തലയ്‌ക്ക് ഓസ്‌ട്രേലിയന്‍ സര്‍ക്കാര്‍ വിലയിട്ടിട്ടുണ്ട്.
2018 ഒക്ടോബറില്‍ ക്വീന്‍സ്ലാന്‍ഡ് കേണ്‍സിന്റെ വടക്ക് 40 കിലോമീറ്റര്‍ മാറിയുള്ള വാങ്കെറ്റി ബീച്ചില്‍ നായ്‌ക്കുട്ടിയുമായി നടക്കാനിറങ്ങിയ തോയ കോര്‍ഡിങ്ലെയെ രാജ്വീന്ദര്‍ കൊലപ്പെടുത്തുകയായിരുന്നു. കോര്‍ഡിങ്ലെ കൊല്ലപ്പെട്ട് രണ്ടു ദിവസത്തിനുള്ളില്‍ തന്റെ ഭാര്യയേയും മൂന്ന് മക്കളെയും ഓസ്‌ട്രേലിയയില്‍ ഉപേക്ഷിച്ച് ഇയാള്‍ നാടുവിട്ടു.
കേണ്‍സില്‍നിന്ന് സിഡ്‌നിയില്‍ എത്തിയ ഇയാള്‍ 23ന് ഇന്ത്യയിലേക്കു പറന്നു. ഒക്ടോബര്‍ 22ന് കേണ്‍സ് വിമാനത്താവളം വഴി രാജ്വീന്ദര്‍ സിങ് രക്ഷപ്പെട്ടതിന്റെ സിസിടിവി ദൃശ്യങ്ങള്‍ പോലീസിന് ലഭിച്ചിരുന്നു. ഇയാള്‍ ഇന്ത്യയില്‍ എത്തിയതായി സ്ഥിരീകരിക്കുകയും ചെയ്തിട്ടുണ്ട്. 2021 മാര്‍ച്ചില്‍ ഇയാളെ കൈമാറണമെന്ന് ഓസ്‌ട്രേലിയ ഇന്ത്യയോട് അഭ്യര്‍ത്ഥിച്ചിരുന്നു. തുടര്‍ന്ന് കേന്ദ്രസര്‍ക്കാര്‍ ഈ മാസം അറസ്റ്റ് ചെയ്യുന്നതിനുള്ള അനുമതി നല്‍കുകയും ദല്‍ഹി പോലീസ് അറസ്റ്റ് ചെയ്യുകയുമായിരുന്നു. ഇയാളെ ഓസ്‌ട്രേലിയയ്‌ക്ക് കൈമാറും.
പഞ്ചാബ് സ്വദേശിയായ രാജ്വീന്ദര്‍ ഇന്നിസ്‌ഫെയ്ലില്‍ നഴ്‌സ് ആയിരുന്നു. ക്വീന്‍സ്ലന്‍ഡ് പോലീസ് ഇതുവരെ വാഗ്ദാനം ചെയ്തിട്ടുള്ളവയില്‍ ഏറ്റവും വലിയ തുകയാണ് രാജ്വീന്ദറിനെ കണ്ടെത്തുന്നതിനായി പ്രഖ്യാപിച്ചിട്ടുള്ളത്.
പ്രതികരിക്കാൻ ഇവിടെ എഴുതുക: