തിരുവനന്തപുരം : ഷാരോണിനെ പഠിച്ചിരുന്ന കോളേജില് വച്ചു തന്നെ കൊല്ലാന് ശ്രമങ്ങള് നടത്തിതയായി പ്രതി ഗ്രീഷ്മ. പോലീസിന് നല്കിയ മൊഴിയിലാണ് ഇക്കാര്യം വ്യക്തമാക്കിയിരിക്കുന്നത്. ഷാരോണിനായി ഡോളോ ഗുളികകള് കലര്ത്തിയ ജ്യൂസ് നല്കിയെങ്കിലും കയ്പ്പ് കാരണം തുപ്പി കളഞ്ഞെന്നും ഗ്രീഷ്മ അറിയിച്ചു.
ഷാരോണ് പഠിക്കുന്ന നെയ്യൂര് സിഎസ്ഐ കോളേജിന്റെ ശുചിമുറിയില് വെച്ചാണ് ഗ്രീഷ്മ ജ്യൂസില് ഗുളികകള് കലര്ത്തിയത്. ഇതിനായി 50 ഡോളോ ഗുളികകള് തലേന്ന് തന്നെ കുതിര്ത്ത് കൈയ്യില് കരുതിയിരുന്നു. പിന്നീട് ഷാരോണിനൊപ്പം കോളേജിലെത്തിയ ഗ്രീഷ്മ ജ്യൂസ് ചലഞ്ച് നടത്തി. എന്നാല് ജ്യൂസിന് കയ്പ്പ് രുചി തോന്നിയ ഷാരോണ് ഇത് തുപ്പിക്കളഞ്ഞു. ഇത്തരത്തില് പലതവണ വധിക്കാന് ശ്രമങ്ങള് ഗ്രീഷ്മയുടെ ഭാഗത്തു നിന്നും ഉണ്ടായി.
പ്രതി ഗ്രീഷ്മയുമായി ഇന്നും അന്വേഷണസംഘം തെളിവെടുപ്പ് നടത്തും. ഗ്രീഷ്മയെ ഷാരോണിന്റെ കോളേജിലും കൊണ്ടുപോകും. കന്യാകുമാരി ജില്ലയിലെ തൃപ്പരപ്പിലാകും പ്രധാന തെളിവെടുപ്പ്. ഷാരോണും ഗ്രീഷ്മയും ഒരുമിച്ച് താമസിച്ച ഹോട്ടലിലാണ് തെളിവെടുപ്പ്. തമിഴ്നാട് നെയ്യൂരില് ഷാരോണ് പഠിച്ച കോളേജിലും പ്രതിയെ ഇന്ന് തന്നെ എത്തിച്ച് തെളിവെടുപ്പ് നടത്തിയേക്കും.
തെളിവെടുപ്പിന്റെ ഭാഗമായി ഗ്രീഷ്മയുടെ ശബ്ദ സാമ്പിള് ആകാശവാണിയില് പരിശോധിച്ച് ഉറപ്പാക്കാനും അന്വേഷണസംഘം തീരുമാനിച്ചിട്ടുണ്ട്. കേസ് തമിഴ്നാട് പോലീസിന് കൈമാറുന്നതാണ് ഉചിതമെന്ന അഡ്വക്കേറ്റ് ജനറലിന്റെ നിയമോപദേശത്തില് പോലീസ് ഉടന് തീരുമാനമെടുത്തേക്കും. പോലീസ് കസ്റ്റഡിയിലുള്ള ഗ്രീഷ്മയുമായി മൂന്നാംദിനമാണ് തെളിവെടുപ്പ് നടത്തുന്നത്.
