കോഴിക്കോട്: താമരശേരിയില് കാറിലെത്തിയ സംഘം സ്കൂട്ടര് യാത്രക്കാരനെ തട്ടിക്കൊണ്ട് പോയി. താമരശ്ശേരി -മുക്കം റോഡില് വെഴുപ്പൂര് സ്കൂളിന് സമീപത്തുവെച്ചാണ് യുവാവിനെ തട്ടികൊണ്ടുപോയത്. ഇന്നോവയിലും മറ്റൊരു കാറിലുമായി എത്തിയ സംഘമാണ് സ്കൂട്ടര് തടഞ്ഞു നിര്ത്തി യാത്രക്കാരനെ കാറിലേക്ക് കയറ്റിയത്.
താമരശ്ശേരി അവേലം സ്വദേശി അഷറഫിനെയാണ് തട്ടിക്കൊണ്ട് പോയത്. പിന്നില് കൊടിയത്തൂര് കേന്ദ്രീകരിച്ചുള്ള സംഘമാണ് തട്ടിക്കൊണ്ടുപോകലിന് പിന്നിലെന്നാണ് കരുതുന്നത്. റോഡില് ഉപേക്ഷിച്ച സ്കൂട്ടറും പോലീസ് കസ്റ്റഡിയിലെടുത്തു.
ശനിയാഴ്ച രാത്രി 9.40 ഓടെയാണ് സംഭവം. ഗള്ഫില് വ്യാപാരിയാണ് അഷ്റഫ്. ഇയാള് സ്കൂട്ടറില് മുക്കം ഭാഗത്ത് നിന്നും താമരശ്ശേരി ഭാഗത്തേക്ക് വരികയായിരുന്നു. തട്ടികൊണ്ട് പോയ സംഘവും താമരശ്ശേരി ഭാഗത്തേയ്ക്ക് പോവുന്നതിനിടെയാണ് ഇയാളെ തട്ടിക്കൊണ്ടുപോയത്. ഇത് കണ്ട രണ്ട് വഴിയാത്രക്കാരാണ് പോലീസിനെ അറിയിച്ചത്.
ഗള്ഫില് വെച്ച് നടത്തിയ സാമ്പത്തിക ഇടപാടുകളുടെ പേരിലാണ് തട്ടിക്കൊണ്ടുപോയതെന്നാണ് പോലീസ് സംശയിക്കുന്നത്. അഷ്റഫിനെ തട്ടിക്കൊണ്ടുപോയ പ്രതികളെയും ഇവര് ഉപയോഗിച്ച വാഹനങ്ങളും തിരിച്ചറിഞ്ഞെന്നാണ് പോലീസ് പറയുന്നത്.
