കണ്ണൂര്: പ്ലസ്ടു വിദ്യാര്ഥിനിക്ക് വാട്സാപ്പില് അശ്ലീലസന്ദേശമയച്ചതിന് ഇടതു കണ്വീനര് ഇ.പി.ജയരാജന് മുന് പ്രൈവറ്റ് സെക്രട്ടറി അറസ്റ്റിലായത് സിപിഎമ്മിന് നാണക്കേടാകുന്നു.
ജയരാജന് കായികമന്ത്രിയായിരിക്കെ പേഴ്സണല് സ്റ്റാഫംഗമായിരുന്ന ഓലയമ്പാടി കാര്യപ്പള്ളി സ്വദേശി കെ.സി.സജീഷിനെ (39) യാണ് പോക്സോ നിയമപ്രകാരം പരിയാരം പോലീസ് അറസ്റ്റ് ചെയ്തത്.ചെറുതാഴം ഗവ. ഹയര് സെക്കന്ഡറി സ്കൂളിലെ കായി അധ്യാപകനാണ്. ഡിവൈഎഫ്ഐ നേതാവായിരുന്നു.
വിദ്യാര്ഥിനി വിവരം വീട്ടില് പറഞ്ഞതോടെ ബന്ധുക്കള് സ്കൂളിലെത്തി പ്രിന്സിപ്പലിന് പരാതി നല്കി. പ്രിന്സിപ്പല് പരാതി പോലീസിന് കൈമാറിയതോടെ പെണ്കുട്ടിയുടെ മൊഴി രേഖപ്പെടുത്തി പോക്സോ നിയമപ്രകാരം കേസെടുക്കുകയായിരുന്നു.
പരാതി നല്കിയെന്നറിഞ്ഞതോടെ ഒളിവില്പോയ അധ്യാപകന് ചെറുകുന്നിലെ കിണറ്റില് ചാടി അത്മഹത്യ ചെയ്യാന് ശ്രമിച്ചെങ്കിലും നാട്ടുകാര് രക്ഷപ്പെടുത്തി. ബുധനാഴ്ച രാത്രി മാടായിപ്പാറയിലുണ്ടെന്നറിഞ്ഞ് പരിയാരം പോലീസ് പഴയങ്ങാടി പോലീസിന്റെ സഹായത്തോടെ ഇയാളെ പിടികൂടി. കോടതിയില് ഹാജരാക്കിയ പ്രതിയെ റിമാന്ഡ് ചെയ്തു.
