മലപ്പുറം:പോപ്പുലര് ഫ്രണ്ടിനെയും അനുബന്ധ സംഘടനകളെയും നിരോധിച്ച കേന്ദ്രസര്ക്കാര് നീക്കം സ്വാഗതാര്ഹമെന്ന് മുന്മന്ത്രിയും എംഎല്എയുമായ കെ.ടി. ജലീല്.
മുസ്ലിങ്ങള്ക്കിടയില് തീവ്രവാദവും വര്ഗ്ഗീയതയും പ്രചരിപ്പിക്കുന്നതായും ദേശവിരുദ്ധ പ്രവര്ത്തനത്തില് പങ്കാളിത്തമുള്ളതായും അക്രമങ്ങള്ക്കും കൊലപാതകങ്ങള്ക്കും നേതൃത്വം നല്കിയതായും ദേശീയ അന്വേഷണ ഏജന്സികള് കണ്ടെത്തിയതിന്റെ വെളിച്ചത്തില് പോപ്പുലര് ഫ്രണ്ടിനെയും അനുബന്ധ സംഘടനകളെയും നിരോധിച്ച കേന്ദ്ര സര്ക്കാര് നീക്കം സ്വാഗതാര്ഹമാണ്. – കെ.ടി. ജലീല് ഫേസ് ബുക്കില് കുറിച്ചു.
പഴയ സിമിക്കാരന് എന്ന ചാപ്പ തനിക്ക് മേല് മാത്രം ചാര്ത്തുന്നത് എന്തുകൊണ്ടാണെന്ന് പിടികിട്ടുന്നില്ലെന്നും അദ്ദേഹം എഴുതി. കൊള്ളയും കൊള്ളിവെപ്പും കൊലപാതകവും നടത്തി നിരവധി കേസുകളില് പ്രതിയായി, പില്ക്കാലത്ത് അതെല്ലാം ഉപേക്ഷിച്ച് സ്വന്തം രാഷ്ട്രീയപാര്ട്ടി രൂപീകരിച്ച് പാര്ലമെന്റ് അംഗം വരെയായ ഫൂലന്ദേവിയെ പഴയ കൊള്ളക്കാരി എന്ന മുദ്രകുത്തി എന്തേ ആരും അപമാനിക്കാതിരുന്നത്?- ജലീല് ചോദിച്ചു.
