കോഴിക്കോട്: കോഴിക്കോട് മെഡിക്കല് കോളേജില് സുരക്ഷാ ജീവനക്കാരെ മര്ദ്ദിച്ച കേസില് പ്രതികളായ ഡിവൈഎഫ്ഐ പ്രവര്ത്തകര് കീഴടങ്ങി. ഡിവൈഎഫ്ഐ സംസ്ഥാന സമിതി അംഗം കെ അരുണ് ഉള്പ്പടെയുള്ളവരാണ് കീഴടങ്ങിയത്. പ്രതികളായ അരുണ്, രാജേഷ്, അഷിന്, മുഹമ്മദ് ഷബീര് എന്നിവരുടെ മുന്കൂര് ജാമ്യാപേക്ഷ കോഴിക്കോട് ജില്ലാ കോടതി ഇന്ന് തള്ളിയതിന് പിന്നാലെയാണ് ഇവര് കോഴിക്കോട് നടക്കാവ് സ്റ്റേഷനില് കീഴടങ്ങിയത്.
ഇക്കഴിഞ്ഞ ബുധനാഴ്ച കോഴിക്കോട് മെഡിക്കല് കോളേജ് ആശുപത്രിയില് ഡിവൈഎഫ്ഐ പ്രവര്ത്തകര് അക്രമം അഴിച്ചുവിട്ടത്. ഡിവൈഎഫ്ഐ ജില്ലാ ജോയിന്റ് സെക്രട്ടറി കെ അരുണിന്റെ നേതൃത്വത്തിലുള്ള എട്ട് അംഗ സംഘമാണ് ആക്രമണം നടത്തിയത്. മെഡിക്കല് കോളേജ് സൂപ്രണ്ടിനെ കാണാനെത്തിയ ദമ്പതികളെ സുരക്ഷാ ജീവനക്കാര് തടഞ്ഞതാണ് പ്രശ്നങ്ങളുടെ തുടക്കം. ദമ്പതികള് പോയതിന് പിന്നാലെ സ്ഥലത്തെത്തിയ അക്രമിസംഘം ജീവനക്കാരെ മര്ദിക്കുകയായിരുന്നു. മൂന്ന് സുരക്ഷാ ജീവനക്കാര്ക്കും, രോഗികളെ സന്ദര്ശിക്കാനെത്തിയവര്ക്കുമാണ് മര്ദനമേറ്റത്.
