ഓണക്കാലത്തെ യാത്ര പ്രതിസന്ധി പരിഹരിക്കാന്‍ ഇന്ത്യന്‍ റെയില്‍വേ; മറുനാടന്‍ മലയാളികള്‍ക്കായി കേരളത്തിന് മൂന്ന് സ്‌പെഷ്യല്‍ ട്രെയിനുകള്‍

തിരുവനന്തപുരം: ഓണക്കാലത്തെ യാത്ര സുഗമമാക്കാന്‍ കേരളത്തിന് കൂടുതല്‍ ട്രെയിനുകള്‍ അനുവദിച്ച് ഇന്ത്യന്‍ റെയില്‍വേ. കര്‍ണാടകയിലേക്കും ഹൈദരാബാദിലേക്കുമായി മൂന്നു ട്രെയിനുകളാണ് അനുവദിച്ചിരിക്കുന്നത്. കര്‍ണാടകയിലെ മൈസൂരു,  യശ്വന്ത്പുര്‍ എന്നിവിടങ്ങളില്‍ നിന്ന് ഓരോ ട്രെയിനുകള്‍ കേരളത്തിലേക്ക് സര്‍വീസ് നടത്തും.  മൈസൂരുവില്‍ നിന്ന് ബംഗളൂരു വഴി തിരുവനന്തപുരത്തേക്കും യശ്വന്ത്പുരയില്‍ നിന്ന് കൊല്ലത്തേക്കും ഹൈദരാബാദില്‍ നിന്ന് തിരുവനന്തപുരത്തേക്കുമാണ് പ്രത്യേക സര്‍വീസ്.

മൈസൂരു തിരുവനന്തപുരം വണ്ടി (06201) സെപ്റ്റംബര്‍ ഏഴിന് ഉച്ചയ്‌ക്ക് 12.15ന് പുറപ്പെടും. 2.05ന് കെഎസ്ആര്‍ ബംഗളൂരുവിലും 7.25ന് സേലത്തും പിറ്റേന്നു രാവിലെ 7.30ന് തിരുവനന്തപുരത്തും എത്തും. തിരിച്ച് സെപ്റ്റംബര്‍ എട്ടിന് ഉച്ചയ്‌ക്ക് 12.45ന് പുറപ്പെട്ട് പിറ്റേന്നു രാവിലെ 11.15ന് മൈസൂരുവിലെത്തും.

യശ്വന്ത്പുര്‍ കൊല്ലം വണ്ടി (06501) സെപ്റ്റംബര്‍ ഏഴിന് ഉച്ചയ്‌ക്ക് ഒരു മണിക്ക് പുറപ്പെട്ട് പിറ്റേന്ന് പുലര്‍ച്ചെ 4.30ന് കൊല്ലത്തെത്തും. തിരിച്ച് സെപ്റ്റംബര്‍ എട്ടിന് രാവിലെ 6.10ന് പുറപ്പെട്ട് രാത്രി 10 മണിക്ക് യശ്വന്ത്പുരിലെത്തും.

ഹൈദരാബാദ് തിരുവനന്തപുരം വണ്ടി (07119) സെപ്റ്റംബര്‍ അഞ്ചിന് വൈകീട്ട് 6.15ന് ഹൈദരാബാദില്‍ നിന്ന് പുറപ്പെട്ട് പിറ്റേന്നു രാത്രി 11.45ന് തിരുവനന്തപുരത്തെത്തും. തിരിച്ച് സെപ്റ്റംബര്‍ 10ന് രാത്രി 10 മണിക്ക് പുറപ്പെട്ട് സെപ്റ്റംബര്‍ 12ന് പുലര്‍ച്ചെ മൂന്ന് മണിക്ക് ഹൈദരാബാദിലെത്തും. ഈ െട്രയിനുകളില്‍ തല്‍ക്കാല്‍ നിരക്കായിരിക്കും ഈടാക്കുക.