കാഞ്ഞാണി: സെപ്തംബര് 1 ന് നറുക്കെടുത്ത കാരുണ്യ ലോട്ടറിയുടെ ഒന്നാം സമ്മാനമായ 80 ലക്ഷം രൂപ കാഞ്ഞാണി പാന്തോട് സ്വദേശി ചുങ്കത്ത് വീട്ടില് ബെന്നി (58 )ക്ക്. ഓട്ടോഡ്രൈവറായ ബെന്നി എടുത്ത കാരുണ്യ പ്ലസ് ഭാഗ്യക്കുറിയുടെ പിജി 455383 എന്ന ടിക്കറ്റിനാണ് സമ്മാനം. സമ്മാനാര്ഹമായ ടിക്കറ്റ് സൗത്ത് ഇന്ത്യന് ബാങ്കിന്റെ കണ്ടശ്ശാംകടവ് ശാഖയില് ഏല്പ്പിച്ചു.
സ്വകാര്യ ആശുപത്രിയിലേക്ക് ഓട്ടം പോയി വരുന്നതിനിടയില് ഒളരിയില് ലോട്ടറി വില്പ്പന നടത്തിയിരുന്ന ആളില് നിന്നും ബെന്നി ടിക്കറ്റെടുക്കുകയായിരുന്നു. ലോട്ടറി ഏജന്റിന്റെ കയ്യിലുണ്ടായിരുന്ന മൂന്ന് ടിക്കറ്റടക്കം അന്നേ ദിവസം 20 ടിക്കറ്റ് ബെന്നി വാങ്ങിയിരുന്നു.
വര്ഷങ്ങളായി ലോട്ടറി എടുക്കുന്ന ബെന്നിക്ക് ആദ്യമായാണ് വലിയൊരു തുക സമ്മാനമായി ലഭിക്കുന്നത്. ഇതോടൊപ്പം എടുത്ത മറ്റു രണ്ടു ടിക്കറ്റിന് ഒരേ നമ്പര് വന്നതിനാല് 8000 രൂപ വീതം വേറെയും സമ്മാനമുണ്ട്.
പഞ്ചായത്ത് പദ്ധതിയില് 8 വര്ഷം മുന്പ് പണിതു കിട്ടിയ 4 സെന്റിലുള്ള വീട്ടിലാണ് ബെന്നിയും കുടുംബവും താമസിക്കുന്നത്. ഭാര്യ: അന്നാസ്. വിദ്യാര്ത്ഥികളായ ഷാരോണ് ദീപ്തി, ട്വിങ്കിള് റോസ്, അമല് ജ്യോതി എന്നിവരാണ് മക്കള്. സമ്മാന തുക മക്കളുടെ വിദ്യാഭ്യാസത്തിനും വിവാഹത്തിനും വേണ്ടി ഉപയോഗിക്കുമെന്നും ബെന്നി പറഞ്ഞു.
