സുപ്രീംകോടതി നടപടികള്‍ ഇന്ന് തത്സമയം കാണാം, പൊതു ജനങ്ങള്‍ക്കായി ലൈവ് സ്ട്രീമിങ് ആരംഭിക്കുന്നു; മറ്റ് കോടതികളിലും ഉടന്‍

ന്യൂദല്‍ഹി :  വിരമിക്കല്‍ ദിനത്തില്‍ സുപ്രീംകോടതി ചീഫ് ജസ്റ്റിസിന്റെ ബെഞ്ചിന്റെ നടപടികള്‍ തത്സമയം ജനങ്ങള്‍ക്കും കാണാന്‍ അവസരം. ഇത് ആദ്യമായാണ് സുപ്രീംകോടതി നടപടികള്‍ ലൈവ് സ്ട്രീമിങ് വഴി തത്സമയം കാണാന്‍ പൊതുജനങ്ങള്‍ക്ക് അവസരമൊരുങ്ങുന്നത്. ചീഫ് ജസ്റ്റിസ് എന്‍.വി.രമണ, നിയുക്ത ചീഫ് ജസ്റ്റിസ് യു.യു. ലളിത്, ഹിമാ കോഹ്ലി എന്നിവരടങ്ങിയ ബെഞ്ചിന്റെ നടപടികളാണ് വെബ് സ്ട്രീം ചെയ്യുക.  

2018 സെപ്തംബറില്‍ ചീഫ് ജസ്റ്റിസ് ദീപക് മിശ്ര, ജസ്റ്റിസുമാരായ എ.എം.ഖാന്‍വില്‍കര്‍, ഡി.വൈ.ചന്ദ്രചൂഡ് എന്നിവരടങ്ങിയ ബെഞ്ച് അന്ന് പുറപ്പെടുവിച്ച സുപ്രധാന ഉത്തരവാണ് ഇതിന് വഴിതെളിച്ചത്. ലൈവ് സ്ട്രീമിംഗിനായി സുപ്രീംകോടതി ഇ- കമ്മിറ്റി സ്വതന്ത്ര പ്ലാറ്റ്‌ഫോം തയ്യാറാക്കിയിട്ടുണ്ട്. ഓഗസ്റ്റ് മുതല്‍ ലൈവ് സ്ട്രീം ആരംഭിക്കാനുള്ള നീക്കത്തിന് നേരത്തെ തുടക്കം കുറിച്ചിരുന്നതാണ്. ഈ പ്ലാറ്റ്‌ഫോം ഭാവിയില്‍ ഹൈക്കോടതികള്‍ക്കും ജില്ലാ കോടതികള്‍ക്കും കൂടി ഉപയോഗിക്കാനാകും. ലൈവ് സ്ട്രീമിങ് ആരംഭിക്കുന്നതോടെ വഴി അടച്ചിട്ട കോടതികളിലെ കേസുകള്‍, മാനഭംഗ കേസുകള്‍, വിവാഹമോചന കേസുകള്‍ എന്നിവ ഒഴികെയുള്ളവയുടെ വിചാരണ നടപടികള്‍ പൊതുജനത്തിന് തത്സമയം കാണാനാകും. ഗുജറാത്ത്, കാര്‍ണാടക, പാട്‌ന, ഒഡീഷ, ജാര്‍ഖണ്ഡ് തുടങ്ങിയ സംസ്ഥാനങ്ങളിലെ ഹൈക്കോടതികള്‍ നേരത്തെ തന്നെ ലൈവ് സ്ട്രീമിങ്് നടത്തുന്നുണ്ട്.  

മുതിര്‍ന്ന അഭിഭാഷക ഇന്ദിര ജയ്‌സിംഗ്, നിയമ വിദ്യാര്‍ത്ഥി സ്വപ്‌നില്‍ ത്രിപാഠി എന്നിവരാണ് ആദ്യം കോടതി നടപടികള്‍ ലൈവ് സ്ട്രീമിങ് നടത്തണമെന്ന ആവശ്യം ഉന്നയിച്ചത്. ജസ്റ്റിസ് ദീപക് മിശ്ര സുപ്രീംകോടതി ചീഫ് ജസ്റ്റിസ് ആയിരിക്കെയായിരുന്നു ഹര്‍ജി പരിഗണിച്ചത്. കേസില്‍ എന്തു സംഭവിക്കുന്നുവെന്ന് ഹര്‍ജിക്കാര്‍ക്ക് നേരിട്ടറിയാന്‍ ഈ സംവിധാനം സഹായകരമാകുമെന്നും ഭരണഘടനാപരമായ അവകാശം കൂടിയാണ് ഇതെന്നുമുള്ള വാദത്തെ കേന്ദ്ര സര്‍ക്കാരും പിന്തുണയ്‌ക്കുകയായിരുന്നു.  

അതേസമയം ചീഫ് ജസ്റ്റിസ് എന്‍.വി.രമണ ഇന്ന് വിരമിക്കും. നിരവധി കേസുകളില്‍ സുപ്രധാന വിധി പ്രസ്താവന നടത്തിയ ശേഷമാണ് എന്‍.വി. രമണ സുപ്രീംകോടതിയുടെ പടിയിറങ്ങുന്നത്. രാജ്യത്തിന്റെ ചരിത്രത്തിലാദ്യമായി ആദിവാസി വിഭാഗത്തില്‍ നിന്നുള്ള വനിതാ രാഷ്‌ട്രപതി ദ്രൗപദി മുര്‍മൂവിന് സത്യവാചകം ചൊല്ലിക്കൊടുത്ത ചീഫ് ജസ്റ്റിസ്. ഏറെ വിശേഷണങ്ങളുമായാണ് സിജെഎ സ്ഥാനത്ത് നിന്ന് ചീഫ് ജസ്റ്റിസ് എന്‍.വി.രമണ പടിയിറങ്ങുന്നത്.  

2014ല്‍ ആണ് എന്‍.വി.രമണ സുപ്രീംകോടതി ജഡ്ജിയാകുന്നത്. 2021 ഏപ്രില്‍ 24ന് ചീഫ് ജസ്റ്റിസ് പദവിയിലെത്തി. ജഡ്ജി എന്ന നിലയില്‍ 174 വിധികളാണ് ചീഫ് ജസ്റ്റിസ് എന്‍.വി.രമണ പുറപ്പെടുവിച്ചത്. അതിലേറെയും ക്രിമിനല്‍ കേസുകളില്‍. വിരമിക്കല്‍ ദിനത്തില്‍ 5 കേസുകളിലാണ് അദ്ദേഹം വിധി പ്രസ്താവിക്കുക.