തിരുവനന്തപുരം : കെ.ടി. ജലീല് എംഎല്എയുടെ പരാമര്ശം ദൗര്ഭാഗ്യകരമായി. ഒരിക്കലും അംഗീകരിക്കാനാവില്ലെന്ന് ഗവര്ണര് ആരിഫ് മുഹമ്മദ് ഖാന്. രാജ്യം 75ാം സ്വാതന്ത്ര്യദിനം ആഘോഷിക്കുകയാണ്. ഈ വേളയില് ഇത്തരത്തിലുള്ള ഒരു പരാമര്ശത്തെ കുറിച്ച് നമ്മള് വീണ്ടും ചര്ച്ച ചെയ്യരുതെന്നും ഗവര്ണര് പറഞ്ഞു. പാങ്ങോട് സൈനിക ക്യാമ്പില് ആസാദി കാ അമൃത് മഹോത്സവ് പരിപാടിയില് പങ്കെടുത്തശേഷം മാധ്യമ പ്രവര്ത്തകരോട് സംസാരിക്കുകയായിരുന്നു അദ്ദേഹം.
ഇത് ആഘോഷത്തിന്റെ സമയമാണ്. സ്വാതന്ത്യത്തിന്റേയും ദേശീയ ഐക്യത്തിന്റേയും അഭിമാന നിമിഷങ്ങളില് എങ്ങിനെയാണ് ഇത്തരത്തില് പറയാന് കഴിയുന്നതെന്നും ഗവര്ണര് ചോദിച്ചു. ആയുധം എടുക്കില്ലെന്നതല്ല അഹിംസ. അഹിംസയും സത്യാഗ്രഹവുമായിരുന്നു ഗാന്ധിയുടെ ആയുധം. ഇപ്പോള് ജലീലിനുള്ള പ്രതികരണത്തിന്റെ സമയമല്ലെന്നും അദ്ദേഹം പറഞ്ഞു.
സൈനിക ശക്തി പ്രതിരോധത്തിന് മാത്രം ഉള്ളതാണ്. ആയുധം എടുക്കില്ല എന്നതല്ല അഹിംസ. കടന്നു കയറ്റം അനുവദിക്കില്ല. ഭീരുത്വമല്ല അഹിംസ. എല്ലാ വൈവിധ്യങ്ങളും അംഗീകരിക്കുന്ന സംസ്കാരമാണ് നമ്മുടേത്. അകത്തു നിന്നുള്ള ഭീഷണിയായാലും പുറത്തു നിന്നുള്ള ഭീഷണി ആയാലും സ്വയം പ്രതിരോധിക്കാന് ആയുധം വേണമെന്നും അദ്ദേഹം കൂട്ടിച്ചേര്ത്തു.
അതേസമയം ദല്ഹിയിലായിരുന്ന കെടി ജലീല് വിവാദങ്ങളെ തുടര്ന്ന് അവിടുത്തെ പരിപാടികള് റദ്ദാക്കി കോഴിക്കോട് തിരിച്ചെത്തി. ആസാദ് കശ്മീര് എന്ന പ്രസ്താവന നല്കുകയും ദല്ഹി പോലീസിന് പരാതി ലഭിക്കുകയും ചെയ്തതിനെ തുടര്ന്ന് കെ.ടി. ജലീല് എംഎല്എ കേരളത്തിലേക്ക് മടങ്ങി. ദല്ഹില് പങ്കെടുക്കേണ്ടുന്ന പരിപാടികള് റദ്ദാക്കിയാണ് കേരളത്തിലേക്ക് മടങ്ങിയത്.
സിപിഎം നേതാക്കളുടെ ഇടപെടലിനെ തുടര്ന്ന് ‘ആസാദ് കശ്മീര്’ എന്നടക്കം പരാമര്ശിക്കുന്ന വിവാദ പോസ്റ്റ് പിന്വലിച്ചെങ്കിലും കേസും സംസ്ഥാനത്തെ പ്രതിപക്ഷ വിമര്ശനങ്ങളും ജലീലിനെ പിന്തുടരുമെന്ന് ഉറപ്പ്. ഇതിനിടയിലാണ് ഗവര്ണറും താന് വളരെയധികം വേദനിച്ചുവെന്നും രോഷം തോന്നുന്നുവെന്നും വ്യക്തമാക്കിയിരിക്കുന്നത്.
