പരപ്പ: മൃഗ ഡോക്ടര്‍മാരുടെ കൃത്യസമയത്തുള്ള സേവനം ലഭിക്കാത്തതിനാല്‍ മലയോര മേഖലയില്‍ മരണത്തിന് കീഴടങ്ങേണ്ടി വരുന്ന വളര്‍ത്തു മൃഗങ്ങളുടെ എണ്ണം വര്‍ദ്ധിക്കുകയാണ്. പല കര്‍ഷകരും പലിശക്ക് പണം വാങ്ങിയും വായ്‌പ എടുത്തുമാണ് വളര്‍ത്തുമൃഗങ്ങളെ വാങ്ങി ഉപജീവനത്തിനായി പോറ്റി വളര്‍ത്തുന്നത്. അതില്‍ പലതും അസുഖം പിടിപെട്ടു കിടപ്പിലാകുമ്പോള്‍ അത്യാവശ്യമായി മൃഗാശുപത്രിയില്‍ ബന്ധപ്പെടുമ്പോള്‍ തന്നെ ജീവനക്കാരില്ല, ഡോക്ടര്‍ ഇല്ല എന്ന് പറഞ്ഞു കൈമലര്‍ത്തുന്ന സ്ഥിതിയാണുള്ളത്.
രോഗങ്ങൾ കാരണം മൃഗങ്ങളുടെ ജീവന്‍ നഷ്ടപ്പെടുന്നതോടൊപ്പം വന്‍ സാമ്പത്തിക നഷ്ട്ടമാണ് ഓരോ കര്‍ഷകര്‍ക്കും ഉണ്ടാകുന്നത്. ഏതാനും ദിവസങ്ങള്‍ക്ക് മുമ്പാണ് പ്രസവമെടുക്കാന്‍ ഡോക്ടറെ കിട്ടാത്തതിനാല്‍ ബിരിക്കുളത്തെ മിനിയുടെ പശു പ്രസവിച്ച ഉടനെ ചത്തത്. കൊട്ടമടലിലെ സ്‌ക്കറിയയുടെ ഒരു വയസുള്ള പശുക്കിടാവും കൃത്യമായ ചികിത്സ കിട്ടാതെ ചത്തിരുന്നു. ബിരിക്കുളം, പെരിയങ്ങാനം, കാലിച്ചാമരം തുടങ്ങി ഏഴോളം ക്ഷീരകര്‍ഷക സംഘങ്ങളിലായി 1500ലധികം ക്ഷീരകര്‍ഷകരാണ് അത്യാവശ്യ സമയങ്ങളില്‍ മൃഗ ഡോക്ടര്‍മാരുടെ സേവനം കിട്ടാതെ നട്ടം തിരിയുന്നത്.
രോഗം പിടിപെട്ട മൃഗങ്ങളെ രക്ഷിക്കാന്‍ ആശുപത്രികളില്‍ 24 മണിക്കൂറും ഡോക്ടറുടെ സേവനവും, ആവശ്യമായ മരുന്നും, ജീവനക്കാരെയും ലഭ്യമാക്കണമെന്ന് മലയോര കര്‍ഷക കൂട്ടായ്‌മയായ ‘മണ്ണിന്റെ കാവലാള്‍’ കര്‍ഷക കൂട്ടായ്‌മ ആവശ്യപ്പെട്ടു.
