ന്യൂദല്ഹി : രാഷ്ട്രപതി ദ്രൗപദി മുര്മുവിനെ ‘രാഷ്ട്രപത്നി’യെന്ന് വിളിച്ച കോണ്ഗ്രസ് ലോക്സഭാകക്ഷി നേതാവ് അധീര് രഞ്ജന് ചൗധരിക്കെതിരെ പ്രതിഷേധം. സ്വകാര്യ മാധ്യമത്തോട് സംസാരിക്കവേയായിരുന്നു അധീര് രഞ്ജന് ചൗധരിയുടെ ഈ പ്രസ്താവന. കോണ്ഗ്രസ് നേതാവിന്റെ പ്രസ്താവനയില് പാര്ലമെന്റിന്റെ ഇരുസഭകളിലും ബിജെപി പ്രതിഷേധം ഉയര്ത്തി.
കോണ്ഗ്രസിനെതിരെ ലോക്സഭയിലും രാജ്യസഭയിലും ബിജെപി നോട്ടീസ് നല്കും. ദ്രൗപദി മുര്മു രാഷ്ട്രപതി സ്ഥാനാര്ത്ഥിയായപ്പോള് തന്നെ കോണ്ഗ്രസ് നിരന്തരം അപകീര്ത്തിപരമായ പരാമര്ശങ്ങളാണ് നടത്തുന്നതെന്നും രാഷ്ട്രപതിയെ അധിക്ഷേപിച്ചതില് മാപ്പു പറയണം. കോണ്ഗ്രസ് സ്ത്രീ വിരുദ്ധരും ആദിവാസി വിരുദ്ധരുമാണെന്ന് കേന്ദ്രമന്ത്രി സ്മൃതി ഇറാനി കുറ്റപ്പെടുത്തി.
അധീര് രഞ്ജന് ചൗധരിയുടെ പ്രസ്താവനയില് കോണ്ഗ്രസ് അധ്യക്ഷ സോണിയ ഗാന്ധി മാപ്പുപറയണമെന്നു കേന്ദ്രമന്ത്രി നിര്മല സീതാരാമന് ആവശ്യപ്പെട്ടു. എന്നാല് രാഷ്ട്രപതി ദ്രൗപദി മുര്മുവിനെ ‘രാഷ്ട്രപത്നി’യെന്നു വിശേഷിപ്പിച്ചത് നാക്കുപിഴയാണെന്ന് അധീര് രഞ്ജന് ചൗധരി പ്രതികരിച്ചു. മാപ്പ് പറയേണ്ട കാര്യമില്ലെന്നും ഇതിന്റെ പേരില് തൂക്കിലേറ്റണമെങ്കില് തൂക്കിലേറ്റാമെന്നും അധീര് രഞ്ജന് ചൗധരി പറഞ്ഞു.
