തൃശൂര്: വാഹനമിടിച്ചു പരിക്കേറ്റ് ചികിത്സയ്ക്ക് എത്തിച്ച നായ്ക്കളുടെ ശരീരത്തില് നിന്ന് വെടിയുണ്ടകള് കണ്ടെത്തി. പാലക്കാട്, ഗുരുവായൂര്, ചെറുതുരുത്തി എന്നിവിടങ്ങളില് നിന്നും ചികിത്സയ്ക്കെത്തിച്ച നായ്ക്കളുടെ ശരീരത്തില് നിന്നാണ് വെടിയുണ്ടകള് കണ്ടെത്തിയത്.
മണ്ണുത്തി വെറ്ററിനറി ആശുപത്രിയില് നടത്തിയ എക്സറേ പരിശോധനയിലാണ് നായ്ക്കളുടെ ശരീരത്തില് വെടിയുണ്ടകള് ഉള്ളതായി കണ്ടത്. സംഭവത്തില് പോലീസ് പ്രാഥമിക അന്വേഷണം തുടങ്ങിയി. ഇക്കഴിഞ്ഞ 11ന് ആറാട്ടുകുളങ്ങരയില് ചികിത്സക്കെത്തിച്ച നായ അസ്വസ്ഥത കാട്ടിയതിനെ തുടര്ന്നാണ് ഇവയെ എക്സ് റേ പരിശോധനയ്ക്ക് വിധേയമാക്കിയത്. പരിശോധനയില് നായയുടെ വയറ്റില് നിന്ന് വെടിയുണ്ടകള് കണ്ടെത്തിയിരുന്നു. എന്നാല് നായ പിന്നീട് ചത്തു.
എയര്ഗണ്ണില് ഉപയോഗിക്കുന്ന പെല്ലറ്റുകളാണ് ശരീരത്തില് ഉണ്ടായിരുന്നത്. മൂന്ന് വെടിയുണ്ടകള് ശരീരത്തില് കണ്ടെത്തി. നായകളെ വെട്ടി പരിക്കേല്പ്പിക്കുന്നതും വെടി വെക്കുന്ന സംഭവങ്ങളും ആവര്ത്തിക്കുന്ന സാഹചര്യത്തില് കൂടുതല് ജാഗ്രത വേണമെന്ന് പ്രദേശവാസികള് ആവശ്യപ്പെട്ടു.
സംഭവത്തിന് തീവ്രവാദ പരിശീലനവുമായി ബന്ധമുണ്ടോ എന്നും പോലീസ് അന്വേഷിക്കുന്നുണ്ട്. കരുനാഗപ്പള്ളിയിലെ വെറ്റ്സ് എന് പെറ്റ്സ് ഫോര്ട്ട് ഹോം എന്ന സ്വകാര്യ മൃഗാശുപത്രിയില് ചികിത്സയിലിരിക്കെയാണ് നായ ചത്തത്.
