മൊണ്ടെവിഡിയൊ: മകളുടെ മരണം അറിയിച്ചുള്ള കേരള ബ്ലാസ്റ്റേഴ്സ് താരം ഉറുഗ്വെയുടെ അഡ്രിയാന്‍ ലൂണയുടെ സമൂഹമാധ്യമ കുറിപ്പ് കണ്ണീരണിയിക്കുന്നതായി. ആറ് വയസുകാരി മകള്‍ ജൂലിയറ്റയുടെ വേര്‍പാടാണ് ലൂണ ഇന്‍സ്റ്റഗ്രാമിലൂടെ ഇന്നലെ പങ്കുവച്ചത്. ഏപ്രില്‍ ആറിനാണ് മകള്‍ മരിച്ചത്. ശ്വാസകോശത്തെയും മറ്റ് ആന്തരികാവയങ്ങളെയും ഗുരുതരമായി ബാധിക്കുന്ന സിസ്റ്റിക് ഫൈബ്രോസിസ് എന്ന രോഗം ബാധിച്ചായിരുന്നു മരണം.
ഇന്‍സ്റ്റഗ്രാം കുറിപ്പിനു പിന്നാലെ അനുശോചന സന്ദേശങ്ങളുമായി ഒട്ടേറെ ആരാധകരെത്തി. ജൂലിയറ്റയുടെ മരണത്തില്‍ ഹൃദയത്തില്‍തട്ടിയുള്ള അനുശോചനം ലൂണയെ അറിയിക്കുന്നുവെന്ന് കേരള ബ്ലാസ്റ്റേഴ്സ് ട്വീറ്റ് ചെയ്തു. 2021ലാണ് ലൂണയുമായി ബ്ലാസ്റ്റേഴ്സ് കറാറിലെത്തുന്നത്. കഴിഞ്ഞ ഐഎസ്എല്‍ സീസണിലെ ബ്ലാസ്റ്റേഴ്‌സിന്റെ ഫൈനല്‍ പ്രവേശത്തില്‍ നിര്‍ണായക പ്രകടനം പുറത്തെടുത്തയാളാണ് ലൂണ.
