മുംബൈ: മഹാരാഷ്ട്രയിലെ മഹാവികാസ് അഘാഡി സര്ക്കാരിന്റെ പ്രശ്നങ്ങള്ക്കുള്ള കാരണം ആദിത്യയുടെ കടന്നുവരവെന്ന് എംഎല്എമാര്. മുഖ്യമന്ത്രി ഉദ്ദവ് താക്കറെ മകന് കൂടുതല് പരിഗണകള് നല്കുകയാണ്. മുതിര്ന്ന നേതാക്കളെ ഒഴിവാക്കി മകന് നല്ല വകുപ്പില് മന്ത്രിയായി അവരോധിച്ചതാണ് പ്രശ്നങ്ങള്ക്ക് തുടക്കമിട്ടത്. സേന രാഷ്ട്രീയത്തില് താക്കറയോടൊപ്പം കരുത്തനാണ് ഇപ്പോള് ഇടഞ്ഞു നില്ക്കുന്ന ഏകനാഥ് ഷിന്ഡെ.
താക്കറെ കുടുംബം അധികാരത്തില് നിന്ന് വിട്ടുനില്ക്കുന്ന പാരമ്പര്യം തുടര്ന്നിരുന്നെങ്കില് 2019ല് മുഖ്യമന്ത്രി പദവിയിലെത്തേണ്ടിയിരുന്നത് ഏകനാഥ് ഷിന്ഡയെയായിരുന്നു. ബിജെപിയുമായി 25 വര്ഷം നീണ്ട ബന്ധം സേന ഉപേക്ഷിഷിച്ചത് തെറ്റായ രാഷ്ട്രീയ നിലപാടാണെന്ന് തുറന്നു പറഞ്ഞ നേതാവാണ് ഷിന്ഡെ.
ഉദ്ധവ് താക്കറെ അധികാരത്തിലെത്തിയതുമുതല് പാര്ട്ടിയിലും മന്ത്രിസഭയിലും തനിക്ക് വേണ്ടത്ര പ്രാധാന്യം കിട്ടുന്നില്ലന്ന് പരാതി ഷിന്ഡെയ്ക്കുണ്ടായിരുന്നു. ഇതിനായി അണികള് അടക്കം ഉയര്ത്തി കാട്ടിയത് ഉദ്ധവിന്റെ മകന് ആദിത്യ താക്കറെയുടെ ഇടപെടലുകളായിരുന്നു. ശിവസേനയുടെ രാഹുല് ഗാന്ധി എന്നുവരെ അദേഹത്തെ അണികള് വിളിക്കുന്നതില് വരെ കാര്യങ്ങള് എത്തിയിരുന്നു.മകന്റെ വഴിവിട്ട നീക്കങ്ങള്ക്ക് പിന്തുണ നല്കിയ ധൃതരാഷ്ട്രറായും വിമതര് താക്കറെ ഉപമിക്കുന്നുണ്ട്.
മന്ത്രിസഭയിലും പാര്ട്ടിയിലും ആദിത്യ രണ്ടാമനായി മാറിയപ്പോള് മുതിര്ന്ന നേതാക്കളെയെല്ലാം പൂര്ണമായും വെട്ടിനിരത്തി. ശിവസേനയിലെ സുപ്രധാന തീരുമാനങ്ങളിലൊന്നും ഷിന്ഡെ പങ്കെടുപ്പിച്ചില്ല. സ്വന്തം തട്ടകമായ താണെയില് മുന്സിപ്പല് കോര്പ്പറേഷന് തിരഞ്ഞെടുപ്പല് സേന തനിച്ച് മല്സരിക്കണം എന്ന ഷിന്ഡെയുടെ നിര്ദേശവും ആദിത്യ താക്കറെ തള്ളിയതോടെയാണ് പാര്ട്ടിയില് കലാപക്കൊടി ഉയര്ന്നത്.
നിലവില് ശിവസേന എംഎല്എമാരില് ഭൂരിപക്ഷം പേരും ഏക്നാഥ് ഷിന്ഡെക്കൊപ്പമാണ്. ഇതോടെ പാര്ട്ടിയില് ഉദ്ദവ് താക്കറെക്കുള്ള നിയന്ത്രണം നഷ്ടമായി. ശിവസേനയ്ക്ക് ആകെയുള്ള 56 എംഎല്എമാരില് 35 പേരും ഷിന്ഡെയ്ക്ക് പിന്തുണ പ്രഖ്യാപിച്ചു. മുഖ്യമന്ത്രി ഉദ്ദവ് താക്കറെ വിളിച്ച് ചേര്ത്ത യോഗത്തില് 16 എംഎല്എമാര് മാത്രമാണ് പങ്കെടുത്തത്. അഞ്ച് എംഎല്എമാര് ഒരു നിലപാടും ഇതുവരെ വ്യക്തമാക്കിയിട്ടില്ല. ശിവസേനയ്ക്കും മഹാ വികാസ് അഘാഡി സര്ക്കാരിനും വെല്ലുവിളി ഉയര്ത്തി ഇവര് ഗുജറാത്തിലെ സൂറത്തിലുള്ള നക്ഷത്രഹോട്ടലില് തങ്ങുകയാണ്.
2019 പൊതുതിരഞ്ഞെടുപ്പില് സഖ്യമായി മത്സരിച്ച ബിജെപിയും ശിവസേനയും തിരഞ്ഞെടുപ്പിന് ശേഷം മുഖ്യമന്ത്രി സ്ഥാനത്തിനായി ബിജെപിയോട് വിലപേശിയിരുന്നു. എന്നാല്, ബിജെപി ഇതിന് വഴങ്ങാത്തതോടെ മുന്നണി വിടുകയും ഏറ്റവും വലിയ ഒറ്റ കക്ഷിയായ ബിജെപിയെ മാറ്റിനിര്ത്തി ശിവസേന എന്സിപിയുമായും കോണ്ഗ്രസുമായും ചേര്ന്ന് സര്ക്കാര് രൂപീകരിക്കുകയുമായിരുന്നു. ശിവസേന 56, എന്സിപി 53, കോണ്ഗ്രസ് 44 എന്നിങ്ങനെയും സ്വതന്ത്രരും ചെറുപാര്ട്ടികളുമടക്കം 169 എംഎല്എമാരുടെ പിന്തുണയാണ് മഹാവികാസ് അഘാടിക്കുള്ളത്. ബിജെപിക്ക് 106 എംഎല്എമാരുണ്ട്.
