തിരുവനന്തപുരം: ശമ്പള വിതരണം അടക്കമുള്ള പ്രശ്നങ്ങളിൽ പരിഹാരം കാണാത്തത്തിൽ പ്രതിഷേധവുമായി സിഐടിയുവിന്റെ നേതൃത്വത്തിൽ തൊഴിലാളി സംഘടനകൾ കെഎസ്ആർടിസി ചീഫ് ഓഫീസ് വളഞ്ഞു. ഓഫീസിന്റെ അഞ്ച് ഗേറ്റുകളും പ്രതിഷേധക്കാർ ഉപരോധിക്കുകയാണ്. ജീവനക്കാരെ ആരെയും ഓഫീസിനുള്ളിലേക്ക് കടത്തി വിടുന്നില്ല. നേരത്തേയെത്തിയ കൺട്രോൾ റൂം ജീവനക്കാർ മാത്രമാണ് ഓഫീസിനുള്ളിലുള്ളത്.
രാവിലെ മുതൽ വൈകീട്ട് വരെ നടക്കുന്ന ഉപരോധ സമരത്തിൽ ജീവനക്കാരെ ആരെയും ഓഫീസിനകത്ത് കാണാൻ അനുവദിക്കില്ലെന്ന് നേതാക്കൾ നേരത്തേ തന്നെ വ്യക്തമാക്കിയിരുന്നു. ശമ്പള പ്രതിസന്ധി അടക്കം കെഎസ്ആർടിസിയിലെ പ്രശ്നങ്ങൾക്ക് ശാശ്വത പരിഹാരം ആവശ്യപ്പെട്ട് നടത്തുന്ന ധർണാസമരം പതിനഞ്ചാം ദിവസത്തിലേക്ക് കടന്നതോടെ യാണ് സമരം ശക്തമാക്കുന്നത്. എന്നാൽ സമരം സർവീസുകളെ ബാധിക്കില്ലെന്ന് നേതാക്കൾ വ്യക്തമാക്കി.
നാളെ ഐഎൻടിയുസി യും ചീഫ് ഓഫീസിലേക്ക് മാർച്ച് നടത്തുന്നുണ്ട്. ബിഎംഎസ് കഴിഞ്ഞ 14 ദിവസമായി സെക്രട്ടേറിയേറ്റിന് മുന്നിൽ അനിശ്ചിതകാല സമരം നടത്തുകയാണ്. സിഐടിയു ഒഴികെയുള്ള സംഘടനകൾ ഈ ആഴ്ച യോഗം ചേർന്ന് പണിമുടക്ക് തീയതി പ്രഖ്യാപിക്കുമെന്ന് അറിയിച്ചിരുന്നു. ഈ പശ്ചാത്തലത്തിൽ ഇരുപത്തിയേഴാം തീയതി യൂണിയൻ നേതാക്കളെ വിശദമായ ചർച്ചയ്ക്ക് ഗതാഗത മന്ത്രി ക്ഷണിച്ചിട്ടുണ്ട്.
