ന്യൂദല്ഹി: മതതീവ്രവാദ സംഘടനയായ ജമാ അത്തെ ഇസ്ലാമിയുടെ കീഴിലുള്ള മീഡിയ വണ്ണിന് പ്രവര്ത്തിക്കാന് അധികാരമില്ലെന്ന് വ്യക്തമാക്കി കേന്ദ്ര സര്ക്കാര്. സുപ്രീംകോടതിയിലാണ് കേന്ദ്രം നിലപാട് അറിയിച്ചത്. സംപ്രേഷണ വിലക്കിന്റെ കാരണം മീഡിയവണിനെ അറിയിക്കേണ്ട കാര്യമില്ല. രാജ്യത്തിന് തന്നെ ഭീഷണിയാകുന്ന പ്രവര്ത്തനങ്ങള് ചാനല് നടത്തിയിട്ടുണ്ട്. ഇക്കാര്യങ്ങള് പുറത്തുപറഞ്ഞാല് രാജ്യസുരക്ഷയെ ബാധിക്കും. അതിനാല് മുദ്രവെച്ച കവറില് ഈ രേഖകള് സുപ്രീംകോടതിയില് സമര്പ്പിക്കാമെന്നും കേന്ദ്രം വ്യക്തമാക്കി.
ദേശീയ സുരക്ഷയുമായി ബന്ധപ്പെട്ടാണ് ലൈസന്സ് പുതുക്കി നല്കാതിരുന്നത്.. ദേശസുരക്ഷയുമായി ബന്ധപ്പെട്ടായതിനാല് വിവരങ്ങള് മീഡിയവണിനെ അറിയിക്കേണ്ടതില്ലെന്നും ദേശസുരക്ഷാ വിവരങ്ങള് മറച്ചുവെക്കാന് ഇന്ത്യന് തെളിവ് നിയമ പ്രകാരം സര്ക്കാരിന് പ്രത്യേക അവകാശമുണ്ടെന്നും കേന്ദ്ര സര്ക്കാര് സുപ്രീംകോടതിയെ അറിയിച്ചു. കോടതി ആവശ്യപ്പെട്ടാല് ഇനിയും വിവരങ്ങള് സമര്പ്പിക്കാമെന്ന് വാര്ത്താവിതരണ വകുപ്പ് ഡയറക്ടര് അറിയിച്ചു. മീഡിയ വണ്ണിന്റെ പലകാര്യങ്ങളും കൃത്യമായല്ല നടന്നത്. രഹസ്യാനേഷണ റിപ്പോര്ട്ടിന്റെ അടിസ്ഥാനത്തിലാണ് സംപ്രേഷണ വിലക്ക് നിര്ദേശിച്ചത്.
ചാനല് സംപ്രേഷണം ചെയ്യുന്നതിന് കേന്ദ്ര സര്ക്കാര് വിലക്ക് ഏര്പ്പെടുത്തിയതിനെ തുടര്ന്ന് ചാനല് അധികൃതര് ഹൈക്കോടതിയെ സമീപിച്ചെങ്കിലും സിംഗിള് ബെഞ്ചും ഡിവിഷന് ബെഞ്ചും ഹര്ജി തള്ളി. തുടര്ന്നാണ് സുപ്രീംകോടതിയെ സമീപിച്ചത്.
ജനുവരി 31നാണ് മീഡിയ വണ്ണിന്റെ സംപ്രേഷണത്തിന് കേന്ദ്രസര്ക്കാര് വിലക്ക് ഏര്പ്പെടുത്തിയത്. ചാനലിനെതിരെ നിരവധി പരാതികള് ലഭിച്ചതിന്റെ അടിസ്ഥാനത്തിലാണ് നടപടി. തുടര്ന്ന് ചാനല് വിലക്കിനെതിരെ ഹൈക്കോടതിയെ സമീപിക്കുകയായിരുന്നു. സംപ്രേഷണ വിലക്ക് റദ്ദ് ചെയ്യണമെന്നാവശ്യപ്പട്ടുള്ള മീഡിയ വണ് ചാനലിന്റെ ഹര്ജി തള്ളിക്കൊണ്ട് കേന്ദ്രസര്ക്കാര് ഉത്തരവ് സിംഗിള് ബെഞ്ച് ആദ്യം ശരിവെയ്ക്കുകയായിരുന്നു.
അതിനുശേഷം ഡിവിഷന് ബെഞ്ചിനെ സമീപിച്ചെങ്കിലും അതും തള്ളി. ചീഫ് ജസ്റ്റീസ് അധ്യക്ഷനായ ഡിവിഷന് ബെഞ്ചാണ് അപ്പീല് ഹര്ജി തളളിയത്. സിഗിംള് ബെഞ്ച് ഉത്തരവില് ഇടപെടേണ്ട സാഹചര്യമില്ലെന്ന് ഡിവിഷന് ബെഞ്ച് വ്യക്തമാക്കി. കേന്ദ്ര സര്ക്കാര് മുദ്ര വെച്ച കവറില് ഹാജരാക്കിയ രഹസ്യ രേഖകള് പരിശോധിച്ച ശേഷമാണ് ഡിവിഷന് ബെഞ്ചിന്റെ തീരുമാനം എടുത്തത്.
