തിരുവനന്തപുരം: അനന്തപുരി ഹിന്ദുമഹാ സമ്മേളന പ്രസംഗക്കേസില് പിസി ജോര്ജിനെ കോടതി റിമാന്ഡ് ചെയ്തു. 14 ദിവസത്തേക്കാണ് റിമാന്ഡ്. രാവിലെ എട്ടുമണിയോടെ പിസി ജോര്ജിനെ മജിസ്ട്രേറ്റിന്റെ ചേംബറില് എത്തിച്ചാണ് ഹാജരാക്കിയത്. പോലീസ് കസ്റ്റഡിയില് ആവശ്യപ്പെട്ടെങ്കിലും പിന്നീട് പരിഗണിക്കാമെന്ന് കോടതി പറഞ്ഞു.
പിസി ജോര്ജിനെ ഇന്നലെ അര്ധരാത്രിയോടെ തിരുവനന്തപുരത്ത് എത്തിച്ചിരുന്നു. ബിജെപി പ്രവര്ത്തകരുടെ പ്രതിഷേധങ്ങളും അഭിവാദ്യം അര്പ്പിക്കലുകളും യാത്രയിലുടനീളം അരങ്ങേറി. തിരുവനന്തപുരം എത്തിയ പിസി ജോര്ജിനെ ബിജെപി ജില്ലാ പ്രസിഡന്റ് വിവി രാജേഷിന്റെ നേതൃത്വത്തിലുള്ള പ്രവര്ത്തകര് എആര് ക്യാമ്പിന് മുന്നില് അഭിവാദ്യം അര്പ്പിച്ചു.
പിസിയുടെ ജാമ്യാപേക്ഷ ഇന്ന് ഹൈക്കോടതി പരിഗണിക്കും. വെണ്ണലയിലെ വിദ്വേഷ പ്രസംഗക്കേസുമായി ബന്ധപ്പെട്ടാണ് പി.സി. ജോര്ജ് പാലാരിവട്ടം സ്റ്റേഷനില് ഹാജരായത്. നിയമത്തിന് വഴങ്ങുന്നുവെന്ന് പറഞ്ഞുകൊണ്ടായിരുന്നു പി.സി. ജോര്ജ് സ്റ്റേഷനിലെത്തിയത്. തുടര്ന്ന് കൊച്ചിയിലെത്തിയ തിരുവനന്തപുരം സിറ്റി പോലീസ് സിഐയുടെ നേതൃത്വത്തിലുള്ള സംഘമാണ് കസ്റ്റഡിയിലെടുത്തത്. അതിനുശേഷം പി.സി. ജോര്ജിനെ പാലാരിവട്ടം പോലീസ് സ്റ്റേഷനില് തിരുവനന്തപുരത്തേയ്ക്ക് കൊണ്ടുപോയി.
അനന്തപുരി ഹിന്ദുമഹാസമ്മേളനത്തിലെ പ്രസംഗത്തിന്റെ പശ്ചാത്തലത്തില് ഫോര്ട്ട് പോലീസ് രജിസ്റ്റര് ചെയ്ത കേസില് നല്കിയിരുന്ന ജാമ്യമാണ് റദ്ദാക്കിയത്. അനിവാര്യമെങ്കില് അറസ്റ്റ് ചെയ്യാമെന്ന് തിരുവനന്തപുരം ഒന്നാം ക്ലാസ് മജിസ്ട്രേറ്റ് കോടതി വ്യക്തമാക്കിയിട്ടുണ്ട്. ജാമ്യവ്യവസ്ഥകള് പി.സി. ജോര്ജ് ലംഘിച്ചെന്ന പ്രോസിക്യൂഷന് വാദം കോടതി അംഗീകരിക്കുകയായിരുന്നു.
അതേസമയം ജാമ്യം റദ്ദാക്കിയ ഉത്തരവിനെതിരെ മേല്ക്കോടതിയെ സമീപിക്കുമെന്ന് ഷോണ് ജോര്ജ് അറിയിച്ചു. തൃക്കാക്കര ഉപതെരഞ്ഞെടുപ്പ് മുന്നില് കണ്ടാണ് ഇടത് സര്ക്കാരിന്റെ ഈ നടപടി. പി.സി. ജോര്ജിനെ പിന്തുണച്ച് പോലീസ് സ്റ്റേഷന് പരിസരത്ത് ബിജെപി പ്രവര്ത്തകരും എത്തിയിരുന്നു.
വര്ഗീയ പ്രസംഗം നടത്തിയ ഫസല് ഗഫൂറും മുജാഹിദ് ബാലുശ്ശേരിയും നാട്ടില് വിലസിനടക്കുന്നു. ഉപതെരഞ്ഞെടുപ്പ് ലക്ഷ്യമാക്കി 20 ശതമാനം വോട്ടിന് വേണ്ടി ജോര്ജിനെ സര്ക്കാര് അകാരണമായി വേട്ടയാടുകയാണെന്ന് ബിജെപി സംസ്ഥാന അധ്യക്ഷന് കെ. സുരേന്ദ്രനും പ്രതികരിച്ചു. പിസി ജോര്ജിന് അഭിവാദ്യം അര്പ്പിക്കാന് പാലാരിവട്ടം പോലീസ് സ്റ്റേഷനില് നേരിട്ടെത്തിയതായിരുന്നു അദ്ദേഹം.
കൊലവിളി നടത്തിയ ബാലനെ ഇതുവരേയും കണ്ടെത്താനായിട്ടില്ല. സംഘാടകര്ക്കെതിരെ നടപടി എടുക്കുന്നില്ല. ഇരട്ടനീതിയാണ് സര്ക്കാര് നടപ്പിലാക്കുന്നത്. നീതി നിഷേധിക്കപ്പെടുന്ന ജോര്ജിനൊപ്പം നിലനില്ക്കുമെന്നും കെ.സുരേന്ദ്രന് പറഞ്ഞു.
