തിരുവനന്തപുരം : ശമ്പളം ലഭിക്കാത്തതില് പ്രതിഷേധിച്ച് കെഎസ്ആര്ടിസിയില് വിവിധ തൊഴിലാളികള് പ്രഖ്യാപിച്ച സൂചനാ പണിമുടക്ക് തുടങ്ങി. അര്ദ്ധരാത്രി തുടങ്ങിയ പണിമുടക്ക് വെള്ളിയാഴ്ച രാത്രി 12 മണി വരെ തുടരും. സമരത്തെ നേരിടാന് മാനേജ്മെന്റ് ഡയസ് നോണ് പ്രഖ്യാപിച്ചിട്ടുണ്ടെങ്കിലും പണിമുടക്കില് ഉറച്ച് നില്ക്കുന്നതായി ഐഎന്ടിയുസി, ബിഎംഎസ്, എഐടിയുസി യൂണിയനുകള് അറിയിച്ചു.
എന്നാല് സിഐടിയു പണിമുടക്കില് പങ്കെടുക്കുന്നില്ല .കഴിഞ്ഞ ദിവസം പ്രതിപക്ഷ യൂണിയനുകളും ഗതാഗതമന്ത്രിയും തമ്മില് നടത്തിയ ചര്ച്ച പരാജയപ്പെട്ടതിനെ തുടര്ന്നാണ് യൂണിയനുകള് പണിമുടക്കിലേക്ക് കടന്നത്.
പണിമുടക്ക് ജനജീവിതത്തെ സാരമായി ബാധിച്ചിരിക്കുകയാണ്. കോഴിക്കോട് നിന്ന് കെഎസ്ആര്ടിസി ഇന്ന് ഒരു സര്വീസ് മാത്രം നടത്തിയിട്ടുള്ളൂ. ദീര്ഘദൂര സര്വ്വീസുകള് മുടങ്ങി എന്നാണ് റിപ്പോര്ട്ട്. വടകര ഡിപ്പോയില് നിന്ന് 11 സര്വീസുകള് മുടങ്ങി.
സംസ്ഥാനത്ത് 93 യുണിറ്റുകളില് നിന്ന് പ്രതിദിനം 3700 ഷെഡ്യുളുകളാണ് കെഎസ്ആര്ടിസിക്ക് ഉള്ളത്. ഇതില് 40% ത്തോളം ഷെഡ്യൂളുകളെയെങ്കിലും സമരം ബാധിക്കും എന്നാണ് അനുമാനം. ഈ മാസം 10 ന് ശമ്പളം നല്കാമെന്നാണ് വ്യാഴാഴ്ച നടന്ന ചര്ച്ചയില് കോര്പറേഷന് സിഎംഡി ബിജു പ്രഭാകര് പറഞ്ഞത്. എന്നാല് 10 ന് ശമ്പളം കിട്ടുമെന്ന് ഉറപ്പില്ലെന്ന് പ്രതിപക്ഷ സംഘടനകള് പറഞ്ഞു. ശമ്പളം നല്കാന് സംസ്ഥാന സര്ക്കാരിന്റെ ഭാഗത്ത് ആത്മാര്ത്ഥമായ ശ്രമമില്ലെന്നും സംഘടനാ നേതാക്കള് അറിയിച്ചു.
Â
Â
Â
Â
