തിരുവനന്തപുരം : മത വിദ്വേഷ പ്രസംഗം നടത്തിയെന്ന് ആരോപിച്ച് പി.സി. ജോര്ജിനെ കസ്റ്റഡിയില് എടുത്തതില് പ്രതിഷേധിച്ച് സംഘപരിവാര് സംഘടിപ്പിക്കുന്ന പ്രതിഷേധ മാര്ച്ചിന് ഐക്യദാര്ഢ്യവുമായി ക്രിസ്ത്യന് അസോസിയേഷന് ആന്ഡ് അലയന്സ് സോഷ്യല് ആക്ഷന്(കാസ). സംഘ പരിവാര് ഇന്ന് ഉച്ചയ്ക്ക് നടത്തുന്ന പ്രതിഷേധ മാര്ച്ചില് പങ്കെടുക്കുമെന്ന് കാസ അറിയിച്ചിട്ടുണ്ട്.
ഇന്ന് ഉച്ചയ്ക്ക് 12 മണിയോടെ പാളയം രക്തസാക്ഷി മണ്ഡപത്തില് നിന്നും എആര് ക്യാമ്പിലേക്കാണ് മാര്ച്ച് നടത്തുന്നത്. ഹിന്ദു ഐക്യവേദി സംസ്ഥാന വൈസ് പ്രസിഡന്റ് വത്സന് തില്ലങ്കേരി മാര്ച്ച് ഉദ്ഘാടനം ചെയ്യും.
ഇന്ന് പുലര്ച്ചെ ഈരാറ്റുപേട്ടയിലെ സ്വന്തം വീട്ടില് വെട്ട് പോലീസ് കസ്റ്റഡിയിലെടുത്ത പി.സി. ജോര്ജിനെ നിലവില് തിരുവനന്തപുരം എആര് ക്യാമ്പില് എത്തിച്ചിരിക്കുകയാണ്. ജനങ്ങളില് നിന്നുള്ള പ്രതിഷേധം കണക്കിലെടുത്താണ് ഇത്. എആര് ക്യാമ്പ് പരിസരത്തേക്ക് പ്രതിഷേധങ്ങള് പെട്ടെന്ന് കടന്ന് ചെല്ലില്ല. ഫോര്ട്ട് സ്റ്റേഷനിലാണെങ്കില് പ്രതിഷേധം സ്റ്റേഷനുള്ളിലേക്ക് കടന്നുകയറാനുള്ള സാധ്യതയുണ്ട്. സുരക്ഷാ സംബന്ധമായ പ്രശ്നങ്ങളുമുണ്ട്. അതിനാലാണ് എആര് ക്യാമ്പിലേക്ക് എത്തിച്ചത്.
അനന്തപുരി ഹിന്ദു സമ്മേളനത്തില് മത വിദ്വേഷ പ്രസംഗം നടത്തിയെന്ന് ആരോപിച്ചാണ് പിസി ജോര്ജിനെ കസ്റ്റഡിയില് എടുത്തത്. യൂത്ത് ലീഗ് ഉള്പ്പടെയുള്ളവര് പരാതി നല്കിയതിന്റെ അടിസ്ഥാനത്തിലാണ് കേസ്. ഡിജിപി അനില് കാന്തിന്റെ നിര്ദ്ദേശ പ്രകാരം തിരുവനന്തപുരം ഫോര്ട്ട് പോലീസാണ് കേസെടുത്തത്.
153 എ വകുപ്പ് പ്രകാരമാണ് പിസി. ജോര്ജിനെതിരെ കേസെടുത്തത്. ഇത് കൂടാതെ 295 എ എന്ന വകുപ്പ് കൂടി ചുമത്തിയിട്ടുണ്ട്. സമൂഹത്തില് ഭീതി വിതക്കും വിധം പ്രസംഗിച്ചതിനാണ് പുതിയ വകുപ്പ്. സ്റ്റേഷന് ജാമ്യം കിട്ടാത്ത വിധത്തിലുള്ള വകുപ്പുകളാണ് ഇത്. പി.സി. ജോര്ജിന്റെ അറസ്റ്റ് രേഖപ്പെടുത്തിയ ശേഷം മജിസട്രേറ്റിന്റെ വീട്ടില് ഹാജരാക്കാനാണ് പോലീസിന്റെ നീക്കം.
