പാലക്കാട്: ശ്രീനിവാസന്റെ കൊലപാതകവുമായി ബന്ധപ്പെട്ട് മൂന്ന് ഇരുചക്രവാഹനങ്ങള്ക്ക് പുറമേ ഒരു കാറും ഉണ്ടായിരുന്നതായി സിസിടിവിദൃശ്യങ്ങള്. പട്ടാമ്പി രജിസ്ട്രേഷനിലുള്ള മാഷാ അള്ള സ്റ്റിക്കര് പതിച്ച ചുവപ്പ് സ്ഫിറ്റ് കാറിലുള്ളവര്ക്കും കൃത്യത്തില് പങ്കുണ്ടെന്ന് പറയുന്നു. 17ന് ഉച്ചക്ക് 12.37ടെയാണ് പാലക്കാട് ഹരിക്കാര തെരുവിലെ ബിജെപി ജില്ലാകാര്യാലയത്തിന് മുന്നിലൂടെ ചുവന്ന കാറും അതിനു പിന്നിലായി മൂന്ന് ഇരുചക്രവാഹനങ്ങളിലായി ആറംഗ കൊലയാളി സംഘവും പോയത്. ജില്ലാ കമ്മിറ്റി ഓഫീസിലെ സിസിടിവിയില്ലാണ് ഈ നാലുവാഹനങ്ങളുടെയും,പ്രതികളുടെയും ചിത്രങ്ങള് പതിഞ്ഞിരിക്കുന്നത്. ഓഫീസിന് പോലീസ് സുരക്ഷ ഏര്പ്പെടുത്തിയിരുന്നതിനാല് പ്രതികള് ഹരിക്കാരതെരുവ് വഴി മേലാമുറിയിലേക്ക് പോവുകയായിരുന്നു.
അതേസമയം, ആര്എസ്എസ് പാലക്കാട് ജില്ലാ മുന് ശാരീരിക് പ്രമുഖ് എ. ശ്രീനിവാസനെ കൊലപ്പെടുത്തിയ കേസില് ഇമാമിന്റെ പങ്ക് നിര്ണായകമാണെന്ന് പോലീസ് വ്യക്തമാക്കി.. കൊലയാളികള്ക്ക് എല്ലാവിധ സഹായവും നല്കിയത് ഇമാമുമാരാണ്. അറസ്റ്റിലായ ശംഖുവാരത്തോട് പള്ളി ഇമാം കാഞ്ഞിരപ്പുഴ അക്കിയംപാടം അലിയുടെ മകന് സദാം ഹുസൈനെ (30)റിമാന്ഡ് ചെയ്തു. പ്രതികളിലൊരാളെ ഒളിപ്പിച്ചതിനാണ് ഇമാം സദാം ഹുസൈനെ അറസ്റ്റ് ചെയ്തത്. കൊലയാളികളിലൊരാളുടെ മൊബൈല് പള്ളിയില് ഒളിപ്പിച്ചതും ഇയാളാണ്. ഇയാള്ക്ക് അരുംകൊലയില് നിര്ണായക പങ്കുണ്ട്.
