ന്യൂദല്‍ഹി: യുപി, ഗോവ, ഉത്തരാഖണ്ഡ്, മണിപ്പൂര്‍ സംസ്ഥാനങ്ങളില്‍ നടന്ന നിയമസഭാ തെരഞ്ഞെടുപ്പുകളില്‍ വന്‍ വിജയം നേടിയതിന് പ്രധാനമന്ത്രി മോദിയെ ബിജെപി എംപിമാര്‍ കയ്യടികളോടെ വരവേറ്റു.
ബജറ്റ് സമ്മേളനത്തിന്റെ ഭാഗമായുള്ള രണ്ടാംഘട്ട പാര്‍ലമെന്‍റ് യോഗത്തിന്റെ ആദ്യദിവസമായ തിങ്കളാഴ്ച ബജറ്റ് നടപടികള്‍ തുടങ്ങി ഏതാനും മിനിറ്റുകള്‍ക്കുള്ളിലാണ് മോദി സഭയില്‍ എത്തിയത്. മോദി സഭയില്‍ പ്രവേശിക്കുന്നതോടെ ബിജെപി എംപിമാര്‍ എഴുന്നേറ്റ് നിന്ന് കരഘോഷം മുഴക്കുകയും ഡെസ്‌കിലിടിക്കുകയും ‘മോദി’, ‘മോദി’…എന്ന വിളികളോടെ വരവേല്‍ക്കുകയായിരുന്നു.
മോദിയുടെ അഭിനന്ദിക്കുന്ന ബിജെപി എംപിമാരുടെ കൂട്ടത്തില്‍ അമിത് ഷാ, രാജ്‌നാഥ് സിങ്ങ്, നിര്‍മ്മല സീതാരാമന്‍, ജ്യോതിരാദിത്യ സിന്ധ്യ എന്നിവരും ഉണ്ടായിരുന്നു. കോണ്‍ഗ്രസ് അധ്യക്ഷ സോണിയാഗാന്ധിയുടെ സഭയില്‍ ഉണ്ടായിരുന്നു.
ആസ്‌ത്രേല്യയില്‍ നിന്നുള്ള പാര്‍ലമെന്‍റ്സംഘം സഭാ നടപടികള്‍ വീക്ഷിക്കാനെത്തിയ വിവരം സ്പീക്കര്‍ ഓം ബിര്‍ള വിശദീകരിക്കുന്നതിനിടയിലായിരുന്നു മോദിയുടെ രംഗപ്രവേശം.
