തിരുവനന്തപുരം: അന്താരാഷ്ട്ര വനിതാ ദിനത്തില് സര്ക്കാര് ആംബുലന്സ് മേഖലയിലെ കനിവ് 108 ആംബുലന്സില് ആദ്യ വനിതാ ഡ്രൈവറായി കോട്ടയം മേമുറി പാലപ്പറമ്പില് വീട്ടില് ദീപമോള് ചുമതലയേറ്റു. ആരോഗ്യ, വനിത ശിശുവികസന വകുപ്പ് മന്ത്രി വീണാ ജോര്ജ് ദീപമോള്ക്ക് ആംബുലന്സിന്റെ താക്കോല് കൈമാറി.
എല്ലാ ജില്ലകളിലും കനിവ് 108 ആംബുലന്സ് ഡ്രൈവര്മാരായി വനിതകളെ നിയമിക്കുമെന്ന് മന്ത്രി വീണാ ജോര്ജ് പറഞ്ഞു. എല്ലാ ജില്ലകളിലും ഇതിന് താത്പര്യമുള്ള വനിതകളെ ഉള്ക്കൊള്ളിക്കണമെന്നാണ് സര്ക്കാര് ആലോചിക്കുന്നത്. എല്ലാ മേഖലകളിലും സ്ത്രീ പങ്കാളിത്തം ഉറപ്പാക്കുക എന്ന ലക്ഷ്യത്തോടു കൂടി പ്രവര്ത്തിക്കുകയാണ്. സ്ത്രീകള്ക്ക് കഴിയില്ല എന്ന് പറഞ്ഞ് മാറ്റി നിര്ത്തുന്ന മേഖലകളില് കൂടി ഇഷ്ടമുള്ള സ്ത്രീകള്ക്ക് കടന്നു വരുന്നതിനുള്ള പ്രവര്ത്തനം ഒരുക്കുക എന്നതുകൂടിയാണ് ലക്ഷ്യം. ദീപമോള് എല്ലാവര്ക്കും പ്രചോദനമാണ്. ഇത് ദീപമോളുടെ സ്വപ്നമെന്നാണ് പറഞ്ഞത്. സ്വപ്നം കാണുക, അതിനെ പിന്തുടര്ന്ന് ആ സ്വപ്നത്തില് എത്തിച്ചേരുക എന്നത് വളരെ പ്രധാനമാണ്. ആ രീതിയില് സമര്പ്പിതമായി അതിനുവേണ്ടി പ്രയത്നിച്ച ദീപമോള്ക്ക് എല്ലാവിധ അഭിനന്ദനങ്ങളും അറിയിക്കുന്നതായും മന്ത്രി പറഞ്ഞു.
വലിയൊരു സ്വപ്നം സാക്ഷാത്ക്കരിച്ചതിന്റെ സന്തോഷത്തിലാണ് ദീപമോള് താക്കോല് ഏറ്റുവാങ്ങിയത്. തന്റെ സ്വപ്നം സാക്ഷാത്ക്കരിക്കാന് പ്രയത്നിച്ച മന്ത്രിയോടും മറ്റെല്ലാവരോടും ദീപമോള് നന്ദി പറഞ്ഞു.
യാത്രകളോടുള്ള അതിയായ മോഹം കൊണ്ടാണ് 2008ല് ദീപമോള് ഡ്രൈവിങ് ലൈസന്സ് എടുത്തത്. ഭര്ത്താവ് മോഹനന്റെ പിന്തുണയോടെ 2009ല് ഹെവി ലൈസന്സും കരസ്ഥമാക്കി. ഭര്ത്താവിന്റെ ആരോഗ്യപ്രശ്നങ്ങള് കാരണം ഡ്രൈവിങ് മേഖല ഉപജീവന മാര്ഗമാക്കാന് ദീപമോള് തീരുമാനിച്ചു. ഡ്രൈവിങ് സ്കൂള് അധ്യാപികയായും ടിപ്പര് ലോറി ഡ്രൈവറായും ടാക്സി ഡ്രൈവറായുമൊക്കെ ദീപ ജോലി ചെയ്തു.
കാലങ്ങളായുള്ള കോട്ടയം ലഡാക് ബൈക്ക് യാത്ര എന്ന മോഹവും ദീപമോള് 2021ല് സഫലീകരിച്ചു. ഭര്ത്താവ് മോഹനന്റെയും വിദ്യാര്ഥിയായ ഏക മകന് ദീപകിന്റെയും പിന്തുണയില് 16 ദിവസം കൊണ്ടാണ് കോട്ടയത്ത് നിന്ന് ലഡാക് വരെ ബൈക്കില് സഞ്ചരിച്ച് എത്തിയത്. കുന്നംകുളത്ത് നടന്ന ഓഫ് റോഡ് ജീപ്പ് മത്സരത്തിലും ഒന്നാം സ്ഥാനം നേടി.ഡ്രൈവിങ് ടെസ്റ്റ് ഉള്പ്പടെയുള്ള നടപടികളും പരിശീലനവും പൂര്ത്തിയാക്കിയാണ് ദീപമോള് വനിതാ ദിനത്തില് 108 ആംബുലന്സ് പദ്ധതിയുടെ ഡ്രൈവിങ് സീറ്റിലേക്ക് എത്തുന്നത്.
