മുംബൈ: സൂപ്പര്‍മാര്‍ക്കറ്റുകളിലും കടകളിലും വൈന്‍ വില്പനയ്ക്ക് അനുമതി നല്‍കിെകാണ്ടുള്ള മഹാരാഷ്‌ട്ര സര്‍ക്കാരിന്റെ തീരുമാനത്തെിനെതിരേ അനിശ്ചിതകാല നിരാഹാര സമരം നടത്തുമെന്ന് അണ്ണാ ഹസാരെ. ഇത്തവണ മഹാരാഷ്‌ട്രയിലെ ഉദ്ധവ് താക്കറെ സര്‍ക്കാരിന്റെ നയത്തിനെതിരെയാണ് അദ്ദേഹത്തിന്റെ സമരം.
സൂപ്പര്‍മാര്‍ക്കറ്റ് വഴി വൈന്‍ വില്‍ക്കാന്‍ അനുമതി നല്‍കാനുള്ള നീക്കമാണ് അണ്ണാ ഹസാരെയെ ചൊടിപ്പിച്ചത്. മഹാരാഷ്‌ട്ര സര്‍ക്കാരിന്റെ തീരുമാനത്തിനെതിരെ അനിശ്ചിതകാല നിരാഹാര സമരം നടത്തുമെന്ന് മുന്നറിയിപ്പ് നല്‍കി ഹസാരെ മുഖ്യമന്ത്രിക്ക് കത്തയച്ചു. മുന്‍പ് കത്തെഴുതിയിട്ടും സര്‍ക്കാര്‍ പ്രതികരിച്ചില്ലെന്നും അദ്ദേഹം പറയുന്നു. സൂപ്പര്‍മാര്‍ക്കറ്റുകളിലും പലചരക്ക് കടകളിലും വൈന്‍ വില്‍ക്കാന്‍ അനുമതി നല്‍കാനുള്ള ഒരുക്കത്തിലാണ് സര്‍ക്കാര്‍. എന്നാല്‍, ഈ തീരുമാനം വരുംതലമുറയെ ബാധിക്കുമെന്നാണ് ഹസാരെയുടെ പക്ഷം. തീരുമാനം പിന്‍വലിച്ചില്ലെങ്കില്‍ നിരാഹാര സമരം ഇരിക്കുമെന്നാണ് താക്കറെയ്‌ക്കുള്ള അദ്ദേഹത്തിന്റെ മുന്നറിയിപ്പ്. ബിജെപിയും ഈ തീരുമാനത്തിനെതിരെ രംഗത്തുണ്ട്.
