ചെറുവത്തൂര്: ദേശീയപാത ആറുവരിയാകുന്നതോടെ ചെറുവത്തൂരിലെ ഗതാഗതവകുപ്പിന്റെ ചെക്ക് പോസ്റ്റ് നീക്കം ചെയ്തേക്കും. ദേശീയപാത വികസനം വന്നാല് ചെറുവത്തൂരില് ചെക്ക് പോസ്റ്റിന്റെ പ്രവര്ത്തനം സാധ്യമല്ലെന്ന് ചൂണ്ടിക്കാട്ടിയുള്ള റിപ്പോര്ട്ട് ബന്ധപ്പെട്ട അധികൃതര് ഗതാഗത കമ്മീഷണര്ക്ക് നല്കിയിട്ടുണ്ട്. പുതിയ ദേശീയപാത വന്നാല് പാതയുടെ മധ്യഭാഗത്ത് ചെക്ക്പോസ്റ്റ് അനുവദിക്കണമെങ്കില് കേന്ദ്രസര്ക്കാരിന്റെ അനുമതി വേണം. ഇതിന് പുറമേ ജില്ലാ അതിര്ത്തിയായ മഞ്ചേശ്വരത്ത് ചെക്ക് പോസ്റ്റ് നിലനില്ക്കുന്ന സാഹചര്യത്തില് ചെറുവത്തൂരില് ചെക്ക് പോസ്റ്റിന് അനുമതി ലഭിക്കുവാന് സാധ്യതയില്ല. ഇത്തരത്തില് ഒട്ടേറെ കാര്യങ്ങള് മുന്നിര്ത്തിക്കൊണ്ടുള്ള റിപ്പോര്ട്ടാണ് ആര്ടിഒ ഗതാഗത കമ്മീഷണര്ക്ക് നല്കിയിട്ടുള്ളത്.
അന്യസംസ്ഥാനങ്ങളില് നിന്ന് വരുന്ന വാഹനങ്ങള് കുറഞ്ഞതോടെ ചെറുവത്തൂരിലെ ചെക്ക് പോസ്റ്റില് നേരത്തെ ലഭിച്ച വരുമാനം ഇപ്പോള് ലഭിക്കുന്നില്ലെന്നാണ് വിവരം. ദേശീയപാത വികസനത്തിന്റെ ഭാഗമായി നിലവില് ചെക്ക് പോസ്റ്റായി പ്രവര്ത്തിക്കുന്ന സ്വകാര്യ വ്യക്തിയുടെ കെട്ടിടം പൊളിച്ച് മാറ്റണം. ചെറുവത്തൂരിലെ ചെക്ക് പോസ്റ്റ് കിഴക്കന് അതിര്ത്തിപ്രദേശമായ പാണത്തൂരിലേക്കോ ജാല്സൂരിലേക്കോ മാറ്റണമെന്നും ദേശീയപാതാ അധികൃതരുടെ അലൈന്മെന്റില് വ്യക്തത വരുത്തണമെന്നാവശ്യപ്പെട്ടുമാണ് റിപ്പോര്ട്ട് അയച്ചിരിക്കുന്നത്. അത് കൂടുതല് ഗുണം ചെയ്യുമെന്ന നിര്ദേശവും റിപ്പോര്ട്ടില് ഉണ്ടെന്നാണറിയുന്നത്.
സംസ്ഥാനപാത ജാല്സൂര് വഴിയും പാണത്തൂര് വഴിയും നികുതി വെട്ടിച്ച് നിരവധി വാഹനങ്ങള് കേരളത്തിലെത്തുന്നുണ്ട്. ഈ പാതയില് ചെക്ക് പോസ്റ്റുവരുന്നതോടെ ഇതിന് ഒരു പരിധിവരെ അറുതിയാകുമെന്നാണ് അധികൃതര് പറയുന്നത്. ചെക്ക് പോസ്റ്റിന്റെ പ്രവര്ത്തനത്തിന് പകരം സംവിധാനം ഇല്ലാതായതോടെ പൊളിച്ചുമാറ്റുന്നത് തല്ക്കാലം നിര്ത്തിവയ്ക്കുകയായിരുന്നു. കെട്ടിടം പൊളിച്ചുമാറ്റിയാല് കണ്ടെയിനറില് ചെക്ക് പോസ്റ്റ് പ്രവര്ത്തിക്കുന്നതിനാവശ്യമായ നടപടികള്ക്കായി നീക്കം നടത്തിയിരുന്നെങ്കിലും ഇത് സംബന്ധിച്ച കാര്യത്തിന് മുകളില് നിന്ന് കൃത്യമായ മറുപടി ലഭിക്കാതെ വന്നതോടെയാണ് ചെക്ക് പോസ്റ്റ് തന്നെ ഒഴിവാക്കി പകരം അതിര്ത്തി പ്രദേശമായ പാണത്തൂരില് ചെക്ക് പോസ്റ്റ് സ്ഥാപിക്കാമെന്ന നിര്ദേശം ഉയര്ന്നത്.
റിപ്പോര്ട്ടില് അനുകൂലമായ നടപടി വന്നാല് ചെറുവത്തൂരിലെ ചെക്ക് പോസ്റ്റ് ഇനി ഓര്മയാകും.
