കണ്ണൂര്: ആശുപത്രികളിലെ കോവിഡ് ബാധിതര് കൂടിയ സാഹചര്യത്തില് കണ്ണൂര് ജില്ലയെ കോവിഡ് നിയന്ത്രണങ്ങള് കൂടുതലുള്ള ‘എ’ കാറ്റഗറിയില് ഉള്പ്പെടുത്തി. ആശുപത്രിയില് പ്രവേശിക്കപ്പെടുന്ന രോഗികളുടെ എണ്ണമുയര്ന്ന സാഹചര്യത്തിലാണ് ജില്ലാ കളക്ടറുടെ പുതിയ ഉത്തരവ്.
പൊതുപരിപാടികള്, രാഷ്ട്രീയ, സാമൂഹിക, സാംസ്ക്കാരിക, മതപരമായ ചടങ്ങുകള്, മരണ,വിവാഹ ചടങ്ങുകള് എന്നിവക്ക് ഇനി 50 പേരെ മാത്രമേ അനുവദിക്കൂ. ആശുപത്രിയിലെ രോഗികളുടെ എണ്ണം കൂടിയതിനാല് പരിയാരം ഗവണ്മെന്റ് മെഡിക്കല് കോളേജുകളില് കോവിഡ് ബാധിതരുടെ പ്രവേശനം ഇനി കണ്ട്രോള് റൂം വഴിയാകുമെന്നും ജില്ലാ കളക്ടര് അറിയിച്ചു.
കോവിഡ് വ്യാപനം രൂക്ഷമായ സാഹചര്യത്തില് കണ്ണൂര് ഗവ.മെഡിക്കല് കോളേജ് ആശുപത്രിയില് സന്ദര്ശകര്ക്ക് നിയന്ത്രണവും ഏര്പ്പെടുത്തി. നാളെ മുതല് രാവിലെ 8.00 മണി മുതല് 11.00 മണി വരെ മാത്രമേ ഒപി പ്രവര്ത്തിക്കു. പനി ബാധിച്ചെത്തുന്ന രോഗികള്ക്കായി പ്രത്യേക ഫീവര് ക്ലിനിക്കും സജ്ജമാക്കി. 2022 ജനുവരി ഒന്നിനെ അടിസ്ഥാനമാക്കി, ആശുപത്രി കേസുകള്, ഐസിയു കേസുകളിലെ വര്ധന എന്നിവ നോക്കിയാണ് നിലവില് സംസ്ഥാനത്തെ ജില്ലകളിലെ കോവിഡ് നിയന്ത്രണം.
ജനുവരി 1ല് നിന്നും ആശുപത്രി അഡ്മിഷന് ഇരട്ടിയും, ഐസിയു കേസുകളില് 50%വും വര്ദ്ധന വന്നാല് കാറ്റഗറി എ, ആശുപത്രി കേസുകളില് കോവിഡ് കേസുകള് 10 ശതമാനവും, ഐസിയു കേസുകള് ഇരട്ടിയും ആയാല് കാറ്റഗറി ബി, ആകെ ആശുപത്രി കേസുകളില് കോവിഡ് രോഗികളുടെ എണ്ണം 25% ആയാല് കാറ്റഗറി സി എന്നിങ്ങനെയാണ് കണക്ക്.
