കാറപകടത്തിൽപ്പെട്ട് ചികിത്സയിൽ കഴിഞ്ഞിരുന്ന ഒന്നര വയസുകാരൻ മരിച്ചതിന് പിന്നാലെ മുത്തശ്ശിയും മരിച്ചു

ഗാന്ധിനഗർ.. മാതാപിതാക്കളോടൊപ്പം യാത്ര ചെയ്യവേ കാർ മരത്തിലിടിച്ച് അപകടത്തിൽ പെട്ട് ചികിത്സയിൽ കഴിഞ്ഞിരുന്ന ഒന്നര വയസുകാരൻ മരിച്ചതിന്റെ പിന്നാലെ മുത്തശ്ശിയും മരിച്ചു. കാഞ്ഞിരപ്പള്ളി മണിമല പൂവത്തോലി തൂങ്കുഴി ജിജോ മഞ്ജു ദമ്പതികളുടെ ഏക ദത്തുപുത്രൻ ഇവാനാണ് മരിച്ചത്. പിന്നാലെ മഞ്ജുവിന്റെ മാതാവ് ചങ്ങനാശ്ശേരി നാലു കോടി കാഞ്ഞിരത്തുംമൂട്ടിൽ പരേതനായ സെബാസ്റ്റ്യന്റെ ഭാര്യ മോളി സെബാസ്റ്റ്യൻ (70) ആണ് മരിച്ചത്.

ഇവാൻ ബുധനാഴ്ച രാവിലെ 10 നും 7 മണിക്കൂറിനു ശേഷം വൈകുന്നേരം 5 ന് മോളിയും മരിച്ചു. ചൊവ്വാഴ്ച വൈകിട്ട് 4.30ന് കുമരകം കവണാറ്റിൻകരയിലായിരുന്നു അപകടം. അപകടത്തിൽ ജിജോ (46), ഭാര്യ മഞ്ജു (45) ഭാര്യാമാതാവ് മോളി സെബാസ്റ്റൻ (70) എന്നിവർക്കും പരിക്കേറ്റിരുന്നു. മൂന്നു പേരുംകോട്ടയം മെഡിക്കൽ കോളജ് ആശുപത്രിയിൽ കഴിയവേയാണ് മോളി മരണപ്പെട്ടത്. 

ഇവാനെ ആദ്യം കുട്ടികളുടെ ആശുപത്രിയിലും പിന്നീട് മെഡിക്കൽ കോളജിലെ ജനറൽ തീവ്ര പരിപരിചരണ വിഭാഗത്തിലും പ്രവേശിപ്പിച്ചു. തലയ്‌ക്ക് ഗുരുതര പരിക്കേറ്റിരുന്ന ഇവാൻ ഇന്നലെ (ബുധനാഴ്ച) രാവിലെ 10ന് മരിച്ചു.മൃതദേഹം കുമരകം പോലീസ് ഇൻക്വസ്റ്റ് നടപടിക്ക് ശേഷം മെഡിക്കൽ കോളജ് മോർച്ചറിയിൽ. ഇന്ന് (വ്യാഴാഴ്ച) പോസ്റ്റ്മോർട്ടത്തിനു ശേഷം മൃതദേഹം ബന്ധുക്കൾക്ക് കൈമാറും.

മോളിയുടെ മൃതദേഹം മെഡിക്കൽ കോളജ് മോർച്ചറിയിൽ.