ന്യൂദല്ഹി: യുപി നിയമസഭാ തിരഞ്ഞെടുപ്പില് സമാജ്വാദി പാര്ട്ടി-രാഷ്ട്രീയ ലോക് ദള്(എസ്പി-ആര്എല്ഡി) സഖ്യത്തിന് പിന്തുണ നല്കുമെന്ന തന്റെ പ്രസ്താവനയില് ഖേദം പ്രകടിപ്പിച്ച് ഭാരതീയ കിസാന് യൂണിയന് പ്രസിഡന്റ് നരേഷ് ടികായത്. എല്ലാ പാര്ട്ടികളുടേയും സ്ഥാനാര്ത്ഥികളെ സ്വാഗതം ചെയ്യുമെന്നും ബിജെപി ഒരിക്കലും തങ്ങളുടെ ശത്രുവല്ലെന്നും നരേഷ് ടികായത്ത് പറയുന്നു.
‘ ഏത് പാര്ട്ടിക്കാര്ക്കും എന്നെ ഏത് സമയത്തും സന്ദര്ശിക്കാം. പക്ഷേ ഒരു രാഷ്ട്രീയ പാര്ട്ടിയേയും പിന്തുണയ്ക്കാനില്ല. ബിജെപി സ്ഥാനാര്ത്ഥികള് ഒരിക്കലും ശത്രുക്കളല്ല, ആര്ക്ക് വേണമെങ്കിലും എന്നെ വന്ന് കാണുകയോ അനുഗ്രഹം വാങ്ങുകയോ ചെയ്യാമെന്നും’ നരേഷ് ടികായത്ത് പറഞ്ഞു. തിരഞ്ഞെടുപ്പില് എസ്പി-ആര്എല്ഡി സഖ്യത്തിന്റെ സ്ഥാനാര്ത്ഥികളെ അതാത് മണ്ഡലങ്ങളില് പിന്തുണയ്ക്കണമെന്ന് നരേഷ് ടികായത്ത് അണികളോട് അഭ്യര്ത്ഥിച്ചിരുന്നു.
താന് അങ്ങനെ പറയരുതായിരുന്നുവെന്നും സംയുക്ത കിസാന് മോര്ച്ചയ്ക്കാണ് കര്ഷക സംഘടനകളുടെ പരമാധികാരമെന്നുമാണ് നരേഷ് ടികായത്ത് പറഞ്ഞത്. കര്ഷക നിയമങ്ങള്ക്കെതിരായി കേന്ദ്രസര്ക്കാരിനെതിരായ പ്രക്ഷോഭത്തിന് നേതൃത്വം നല്കിയ നേതാക്കളാണ് രാകേഷ് ടികായത്തും നരേഷ് ടികായത്തും.
