കുറ്റൂര്‍: വേനല്‍ കനത്തതോടെ വരട്ടാര്‍ വരണ്ട് തുടങ്ങി. കുടിവെളളക്ഷാമവും രൂക്ഷമാകുന്നു. ദിവസങ്ങളായി അനുഭവപ്പെടുന്ന കനത്ത ചൂടും മഴ മാറിയതുമാണ് ആറ്റിലെ ജലനിരപ്പ് കുറയാന്‍ കാരണം.ഇതോടെ ആറിന്റെ അവശേഷിക്കുന്ന ഭാഗങ്ങളില്‍ വെള്ളത്തിന് നിറവിത്യാസമുണ്ട്.
കുറ്റൂര്‍ തലയാര്‍ വഞ്ചിമൂട്ടില്‍ ഭാഗങ്ങളില്‍ ആറ്റില്‍ കറുപ്പ് നിറത്തിലാണ് വെള്ളം കെട്ടി കിടക്കുന്നത്. തൈമറവുംകര, പുതുക്കുളങ്ങര, മേപ്രം എന്നിവിടങ്ങളിലെ പല ഭാഗങ്ങളിലും ആറിന്റെ അടിത്തട്ട് തെളിഞ്ഞിട്ടുമുണ്ട്. കഴിഞ്ഞ പ്രളയ കാലത്ത് പുഴ നിറഞ്ഞ് സമൃദ്ധമായി ഒഴുകിയ പ്രദേശങ്ങളിലാണ് ഇപ്പോള്‍ വെള്ളമില്ലാത്ത അവസ്ഥയില്‍ എത്തിയത്. സമീപ കാലത്തെങ്ങും ഇത്തരത്തിലുള്ള പ്രതിഭാസം ഉണ്ടായിട്ടില്ലെന്ന് പ്രദേശവാസികള്‍ പറയുന്നു. നീരൊഴുക്ക് വീണ്ടെടുക്കാനായി പല പദ്ധതികളും തുടങ്ങിയെങ്കിലും ഒന്നും കാര്യമായ വിജയമുണ്ടായില്ല. മഴക്കാലത്ത് മാത്രം നിറഞ്ഞ് ഒഴുകുന്ന പുഴയായി ഇന്നും അവശേഷിക്കുന്നു.ആറ്റില്‍ മിക്കയിടങ്ങളിലും ചെളിയടിഞ്ഞു.
മരങ്ങള്‍ കടപുഴകി വീണു. മാലിന്യങ്ങള്‍ കെട്ടികിടന്നുള്ള ദുര്‍ഗന്ധം മൂലം ആളുകള്‍ വെള്ളത്തില്‍ ഇറങ്ങാന്‍ പോലും മടിക്കുകയാണ്.ഇപ്പോള്‍ ഇറങ്ങിയാല്‍ ശരീരം ചൊറിഞ്ഞ് തടിക്കും.കണ്ണട്ടയുടെയും ശല്യവുമുണ്ട്. കുറ്റൂര്‍ ചേലൂര്‍ക്കടവിന് സമീപത്തെ വലിയ കുഴിയില്‍ വെള്ളമില്ല.അതേ സമയം വരട്ടയാര്‍ വരണ്ടതോടെ സമീപ പ്രദേശങ്ങളില്‍ കുടിവെള്ള ക്ഷാമം നേരിടുന്നുണ്ട്.അഞ്ച് വര്‍ഷം മുന്‍പ് വരട്ടയാര്‍ വീണ്ടെടുക്കാന്‍ വന്‍ പദ്ധതികള്‍ ആരംഭിച്ചെങ്കിലും എല്ലാം പാതി വഴിയില്‍ പണി നിര്‍ത്തി. പുനരുജ്ജീവനത്തിന്റെ രണ്ടാം ഘട്ടമായി നദിയില്‍ അടിഞ്ഞ് കൂടിയ മണ്ണ് നീക്കുന്ന ജോലികള്‍ പുതുവര്‍ഷത്തിന്റെ തുടക്കത്തില്‍ ആരംഭിച്ചിരുന്നു. 43.98 കോടി രൂപയാണ് പദ്ധതി ചെലവ്. ക്യൂബിക് മീറ്ററിന് 687 രൂപയാണ് മണ്ണിന്റെ റോയല്‍റ്റിയായി കണക്കാക്കിയിരിക്കുന്നത്. ഇത്രയും അളവില്‍ മണ്ണ് നീക്കം ചെയ്യുമ്പോള്‍ പ്രദേശത്ത് കുടിവെള്ള ക്ഷാമം അതിരൂക്ഷമാകുമോ എന്ന ആശങ്കയിലാണ് നാട്ടുകാര്‍.
