വാസ്‌കോ: പുതുവര്‍ഷത്തെ ആദ്യ ഇന്ത്യന്‍ സൂപ്പര്‍ ലീഗ് മത്സരത്തില്‍ വിജയം ലക്ഷ്യമിട്ട് മഞ്ഞപ്പട. തിലക് മൈതാന്‍ സ്‌റ്റേഡിയത്തില്‍ നാളെ കേരള ബ്ലാസ്റ്റേഴ്സ് ആതിഥേയരായ എഫ്‌സി ഗോവയുമായി മാറ്റുരയ്‌ക്കും. രാത്രി 7.30 നാണ് കിക്കോഫ്. സ്റ്റാര്‍ സ്‌പോര്‍ട്‌സില്‍ തത്സമയം കാണാം. 2022 ല്‍ ഐഎസ്എല്ലിലെ ആദ്യ മത്സരമാണിത്. പുതുവര്‍ഷത്തെ ആദ്യ ദിനമായ ഇന്നലെ മത്സരമുണ്ടായിരുന്നില്ല.
ഈ സീസണിലെ ഉദ്ഘാടന മത്സരത്തില്‍ എടികെ മോഹന്‍ ബഗാനോട് തോറ്റശേഷം ബ്ലാസ്റ്റേഴ്സ് തോല്‍വിയറിയാതെ കുതിക്കുകയാണ്. ഇതുവരെ കളിച്ച എട്ട് മത്സരങ്ങളില്‍ ഏഴിലും തോല്‍വി അറിഞ്ഞില്ല. മൂന്ന് ജയവും നാലു സമനിലയും സ്വന്തമാക്കി. 13 പോയിന്റുമായി അഞ്ചാം സ്ഥാനത്താണ്. ഗോവയെ തോല്‍പ്പിച്ചാല്‍ ബ്ലാസ്‌റ്റേഴസിന് പോയിന്റ് നിലയില്‍ ഒന്നാം സ്ഥാനത്തെത്താം. 2021 ലെ അവസാന ലീഗ് മത്സരത്തില്‍ ബ്ലാസ്റ്റേഴ്സ് ജംഷഡ്പൂര്‍ എഫ്‌സിയുമായി സമനില പിടിച്ചു. അതേസമയം, എഫ്‌സി ഗോവ പോയവര്‍ഷത്തെ അവസാന ഐഎസ്എല്‍ മത്സരത്തില്‍ എടികെ മോഹന്‍ ബഗാനോട് ഒന്നിനെതിരെ രണ്ട് ഗോളുകള്‍ക്ക് തോറ്റു. ഈ സീസണില്‍ ഇതുവരെ കളിച്ച എട്ട് മത്സരങ്ങളില്‍ ഗോവയ്‌ക്ക് രണ്ട് വിജയം മാത്രമേ നേടാനായുള്ളൂ. നാലു മത്സരങ്ങള്‍ തോറ്റു. രണ്ട് സമനിലയും നേടിയ അവര്‍ എട്ട് പോയിന്റുമായി ഒമ്പതാം സ്ഥാനത്താണ്.
വിദേശ താരങ്ങളായ അഡ്രിയാന്‍ ലൂണ, അല്‍വാരോ വാസ്‌കെസ്, ജോര്‍ഗെ പെരേര ഡയസ് എന്നിവരാണ് ബ്ലാസ്‌റ്റേഴ്‌സിന്റെ കരുത്ത്. മുന്നേറ്റ താരം സഹല്‍ അബ്ദുള്‍ സമദും ഇവര്‍ക്കൊപ്പം ചേരുമ്പോള്‍ ഏതു ടീമിനെയും വിറപ്പിക്കാന്‍ ബ്ലാസ്‌റ്റേഴ്‌സിന് കഴിയും. അതേസമയം, ഇന്ത്യന്‍ സൂപ്പര്‍ ലീഗില്‍ ബ്ലാസ്‌റ്റേഴ്‌സിനെതിരെ എഫ്‌സി ഗോവയ്‌ക്ക് മികച്ച റെക്കോര്‍ഡുണ്ട്. ഐഎസ്എല്ലില്‍ ഈ ടീമുകള്‍ പതിനാല് മത്സരങ്ങളില്‍ ഏറ്റുമുട്ടി. ഒമ്പതിലും ഗോവയാണ് വിജയിച്ചത്. കേരള ബ്ലാസ്‌റ്റേഴ്‌സിന് ജയിക്കാനായത് മൂന്ന് മത്സരങ്ങളില്‍ മാത്രം. രണ്ട് മത്സരങ്ങള്‍ സമനിലയായി. ഗോവ ഇതുവരെ ബ്ലാസ്‌റ്റേഴ്‌സിനെതിരെ 34 ഗോളുകള്‍ നേടി. അതേസമയം, ബ്ലാസ്‌റ്റേഴ്‌സിന് പതിനേഴ് ഗോളുകളേ ഗോവയുടെ വലയിലേക്ക് അടിച്ചുകയറ്റാനായിട്ടൊള്ളൂ.
