കുന്നംകുളം: പുതുവര്ഷാഘോഷം കേന്ദീകരിച്ച് ലഹരി വില്പനക്കായി എത്തിയ സംഘം പിടിയില്. ചെമ്മണ്ണൂര് മമ്പറംമ്പത്ത് വീട്ടില് മുകേഷ് (23), ചൂണ്ടല് പയ്യൂര് മമ്മസ്രായില്ലാത്തു വീട്ടില് അബു (26), ചെമ്മണ്ണൂര് പാനപറമ്പ് ഉങ്ങുങ്ങല് വീട്ടില് അരുണ് (21) എന്നിവരെയാണ് കുന്നംകുളം എസിപിയുടെ നിര്ദേശ പ്രകാരം കുന്നംകുളം സിഐ സൂരജ് വിസിയുടെ നേതൃത്വത്തില് അറസ്റ്റ് ചെയ്തത്.
ബെംഗളൂരുവില് നിന്നും വന്തോതില് മയക്കു മരുന്ന് വാങ്ങി ആവശ്യക്കാര്ക്ക് വില്പന നടത്തുന്നതിനായി കൊണ്ടു വന്ന പന്ത്രണ്ടോളം മയക്കുമരുന്ന് പാക്കറ്റുകളും അര കിലോയോളം കഞ്ചാവും ഒരു കിലോയിലേറെ കഞ്ചാവ് ലേഹ്യവും പോലീസ് ഇവരില് നിന്ന് പിടികൂടി.
കുന്നംകുളം ആനായ്ക്കല് ഭാഗത്തെ പട്രോളിങിനിടയിലാണ് പോലീസ് ഇവരെ അറസ്റ്റ് ചെയ്തത്. ചെമ്മണൂര് ബസ് സ്റ്റോപ്പിന് സമീപം നിര്ത്തിയിട്ടിരുന്ന കാറില് അഞ്ചോളം പേര് ഇരിക്കുന്നത് കണ്ട് പരിശോധനയ്ക്കെത്തിയപ്പോള് രണ്ടു പേര് കാറില് നിന്ന് ഇറങ്ങി ഓടുകയായിരുന്നു. ഇത് കണ്ട് കാറിലുള്ളവരെ പരിശോധിച്ചപ്പോഴാണ് ഇവര് ലഹരി മരുന്ന് വില്പനയ്ക്കെത്തിയവരാണെന്ന് മനസിലായത്.
സബ് ഇന്സ്പെക്ടര്മാരായ ഗോപിനാഥന്, ബസന്ത്, എഎസ്ഐ ഗോകുലന് തുടങ്ങിയവര് അന്വേഷണ സംഘത്തില് ഉണ്ടായിരുന്നു.
