അമ്പലപ്പുഴ: നാടുവിറപ്പിക്കുന്ന ഗുണ്ടാസംഘങ്ങളെ ഒതുക്കാന് ആന്റി ഗുണ്ടാ സ്ക്വാഡുമായി പോലീസ്. ഓരോ സ്റ്റേഷനിലെയും അഞ്ചു പോലീസുകാരെ ചേര്ത്താണ് സ്ക്വാഡ് രൂപീകരിക്കുന്നത്. പുതിയ ടീം ഉടന് പ്രവര്ത്തനം ആരംഭിക്കും.
അമ്പലപ്പുഴ, നെടുമുടി, പുന്നപ്ര, പുളിങ്കുന്ന്, കൈനകരി, എടത്വ, കൈനടി, രാമങ്കരി, തോട്ടപ്പള്ളി കോസ്റ്റല് എന്നീ പോലീസ് സ്റ്റേഷനുകളുടെ ചുമതല അമ്പലപ്പുഴ ഡിവൈഎസ്പി എസ്.റ്റി. സുരേഷ്കുമാറിനാണ്. ഇവിടങ്ങളിലെ പ്രധാന കുറ്റവാളികളുടെ ലിസ്റ്റുകള് പോലീസ് തയാറാക്കി തുടങ്ങി. പുന്നപ്രയെ നടുക്കിയ കാകന് മനു വധക്കേസില് ഇപ്പോള് ജാമ്യത്തിലിറങ്ങിയിരിക്കുന്ന ചില പ്രതികള് നിരീക്ഷണത്തിലാണ്.
പുന്നപ്ര ഗലീലിയ കടപ്പുറത്തും തീരദേശ റോഡിലും ലഹരിക്കടിമകളായ പ്രതികള് യാത്രക്കാര്ക്കും നാട്ടുകാര്ക്കും ഭീഷണിയാകുന്നതായി ആക്ഷേപമുണ്ട്. ആലപ്പുഴയിലെ ഇരട്ടക്കൊലപാതക സാഹചര്യത്തില് അമ്പലപ്പുഴ, വളഞ്ഞവഴി, കരൂര്, മാക്കി മുക്ക്, പേരൂര് കോളനി തുടങ്ങി ഇരുകക്ഷികള്ക്കും സ്വാധീനമുള്ള മേഖലയിലും പോലീസ് റോന്തുചുറ്റല് ശക്തമാക്കിയിട്ടുണ്ട്. കഞ്ചാവ്, മയക്കുമരുന്ന് ലോബിയുടെ പ്രവര്ത്തനവും വ്യാപകമാണ്.
