തിരുവനന്തപുരം : ശശി തരൂര് കോണ്ഗ്രസ് പാര്ട്ടിയിലെ ഒരു എംപി മാത്രം. പാര്ട്ടി നിലപാട് അംഗീകരിച്ചില്ലെങ്കില് പൂറത്തുപോകേണ്ടി വരുമെന്ന് കെപിസിസി അധ്യക്ഷന് കെ.സുധാകരന്. ഇക്കാര്യത്തില് കര്ശന നിലപാടാണ് പാര്ട്ടിക്കുള്ളതെന്നും സുധാകരന് വ്യക്തമാക്കി. കണ്ണൂരില് മാധ്യമങ്ങളോട് സംസാരിക്കവേയാണ് ഇക്കാര്യം അറിയിച്ചത്.
കെ- റെയിലില് മറുപടി എഴുതിത്തരാന് തരൂരിനോട് ആവശ്യപ്പെട്ടിട്ടുണ്ട്. പാര്ട്ടി ഒരു തീരുമാനമെടുത്താല് പാര്ട്ടിയുടെ എല്ലാ എംപിമാരും അത് അംഗീകരിക്കണം. ശശി തരൂരിന് മറ്റെന്തെങ്കിലും അജണ്ടയുണ്ടെന്നോ പാര്ട്ടിയില് നിന്ന് അകന്നുവെന്നോ അഭിപ്രായമില്ല. കെ റെയില് വിഷയത്തില് പാര്ട്ടിയുടേയും മുന്നണിയുടേയും നിലപാടിന് വിരുദ്ധമായ നിലയില് ശശി തരൂര് പ്രതികരണം തുടരുകയും പിണറായി വിജയനെ പൊതുവേദികളില് പ്രശംസിച്ചു സംസാരിക്കുകയും ചെയ്ത സാഹചര്യത്തിലാണ് സുധാകരന് ഇത്തരത്തില് നിലപാട് വ്യക്തമാക്കിയത്.
പി.ടി. തോമസിനെ പാര്ട്ടി ഒരിക്കലും തഴഞ്ഞിട്ടില്ല. വിജയസാധ്യത കുറവായതിനാലാണ് ഇടുക്കി സീറ്റ് നല്കാതിരുന്നത്. സാമുദായിക സംഘടനകളെ പരിഗണിക്കാതെ ഇക്കാലത്ത് ഒരു രാഷ്ട്രീയ പാര്ട്ടികള്ക്കും മുന്നോട്ട് പോകാനാകില്ല.
മരണാനന്തരം ശരീരം ദഹിപ്പിക്കണം എന്നു പറഞ്ഞ പിടി തോമസിന്റെ അന്ത്യാഭിലാഷം ഞങ്ങള് നടത്തിക്കൊടുത്തു. മൂന്നാം തീയതി ചിതാഭസ്മം ഉപ്പു തോട്ടിലെ വീട്ടുകല്ലറയില് സമര്പ്പിക്കും. പ്രകൃതി സംരക്ഷണവുമായി ബന്ധപ്പെട്ട വിഷയത്തില് പിടിയുടെ നിലപാടാണ് ശരി എന്ന് കാലം തെളിയിച്ചുവെന്ന പറഞ്ഞ സുധാകരന് ഗാഡ്കില് വിഷയത്തില് പുരോഹിതര് പിടി തോമസിന്റെ ശവമഞ്ചം ചുമന്ന സംഭവം കഴിഞ്ഞ കാര്യമാണെന്നും അവര്ക്ക് അതില് പശ്ചാത്താപം ഉണ്ടെന്നും പറഞ്ഞു ഇക്കാര്യത്തില് താന് കൂടുതല് പ്രതികരണത്തിന് ഇല്ലെന്നും സുധാകരന് വ്യക്തമാക്കി.
ഗാഡ്ഗില് കമ്മറ്റി റിപ്പോര്ട്ടില് വെള്ളംചേര്ത്തത് തെറ്റായിപ്പോയെന്ന് ഇപ്പോള് തോന്നുന്നു. നമ്മുടെ നാടിന്റെ പോക്ക് അങ്ങോട്ടാണ്. പെണ്കുട്ടികളുടെ വിവാഹപ്രായം വര്ധിപ്പിക്കുന്ന വിഷയത്തില് കോണ്ഗ്രസ് ഔദ്യോഗികമായി ഒരു നിലപാടിലെത്തിയിട്ടില്ല. ഞങ്ങള് വിഷയം പഠിച്ചുകൊണ്ടിരിക്കുകയാണ്. വിവാഹപ്രായം 21 വയസ്സാക്കുന്നതില് ഗുണവും ദോഷവുമുണ്ടെന്നും കെ. സുധാകരന് കൂട്ടിച്ചേര്ത്തു.
