കൊച്ചി: ഔദ്യോഗിക സന്ദര്ശനത്തിനായി രാഷ്ട്രപതി രാം നാഥ് കോവിന്ദ് നാളെ കേരളത്തില് എത്തും. ഡിസംബര് 21ന് കാസര്ഗോഡ് പെരിയ ക്യാമ്പസ്സില് നടക്കുന്ന കേരള കേന്ദ്ര സര്വ്വകലാശാലയുടെ അഞ്ചാമത് ബിരുദദാന ചടങ്ങില് അദ്ദേഹം മുഖ്യാതിഥിയാകും. പ്രത്യേകം തയ്യാറാക്കിയ വേദിയില് വൈകിട്ട് 3.30നാണു പരിപാടി.
കേരള ഗവര്ണര് ആരിഫ് മുഹമ്മദ് ഖാന്, സംസ്ഥാന തദ്ദേശ സ്വയംഭരണ എക്സൈസ് മന്ത്രി എം. വി. ഗോവിന്ദന് എന്നിവരും പരിപാടിയില് സംബന്ധിക്കും. 2018-2020 ബാച്ചിന്റെ ബിരുദദാന ചടങ്ങാണ് നടക്കുന്നത്. 742 വിദ്യാര്ത്ഥികളാണ് ബിരുദം ഏറ്റുവാങ്ങുന്നത്.
തുടര്ന്ന് കൊച്ചിയിലെത്തുന്ന രാഷ്ട്രപതി ഡിസംബര് 22ന് നേവല് ബേസില് വിവിധ പരിപാടികളില് സംബന്ധിക്കും. ദക്ഷിണ നാവിക കമാന്ഡിന്റെ പ്രവര്ത്തന പ്രദര്ശനം വീക്ഷിക്കുന്ന അദ്ദേഹം വിക്രാന്ത് സെല്ലും സന്ദര്ശിക്കും. ഡിസംബര് 23ന് രാവിലെ കൊച്ചിയില് നിന്നും തിരുവനന്തപുരത്ത് എത്തുന്ന രാഷ്ട്രപതി, പി.എന്.പണിക്കര് ഫൗണ്ടേഷന് സംഘടിപ്പിക്കുന്ന പരിപാടിയിലും പങ്കെടുക്കും.
