കാസര്കോഡ്: പ്ലസ് വണ് വിദ്യാര്ത്ഥിയെ സീനിയര് വിദ്യാര്ത്ഥികള് ചേര്ന്ന് മുടി മുറിച്ചു. ഉപ്പള ഗവ. ഹയര്സെക്കന്ഡറി സ്കൂളിലെ പ്ലസ് വണ് വിദ്യാര്ത്ഥിയേയാണ് ബലമായി മുടി മുറിച്ചുമാറ്റി പ്ലസ്ടു വിദ്യാര്ത്ഥികള് റാഗിങ്ങിനിരയാക്കിയത്. കഴിഞ്ഞ ചൊവ്വാഴ്ച സ്കൂളിന് സമീപത്തെ ഒരു കഫ്റ്റീരിയയില്വെച്ചാണ് സംഭവം നടന്നത്.
പ്ലസ് വണ് വിദ്യാര്ത്ഥിയെ ബലമായി പിടിച്ചു നിര്ത്തി ഒരുസംഘം വിദ്യാര്ത്ഥികള് ചേര്ന്ന് മുടി മുറിക്കുകയായിരുന്നു. ഇതിന്റെ വീഡിയോ ദൃശ്യങ്ങള് പുറത്തുവന്നിട്ടുണ്ട്. ഇത് വ്യാപകമായി പ്രചരിച്ചതോടെയാണ് നാട്ടുകാര് സംഭവമറിയുന്നത്. എന്നാല് സ്കൂള് കോമ്പൗണ്ടിനകത്ത് വെച്ചല്ല സംഭവം നടന്നത്. ഇതുസംബന്ധിച്ച് ഒരു പരാതിയും ലഭിച്ചിട്ടില്ലെന്നും പ്രിന്സിപ്പല് പ്രതികരിച്ചു.
ദൃശ്യങ്ങളിലുള്ള പ്ലസ്ടു വിദ്യാര്ത്ഥികളെ തിരിച്ചറിഞ്ഞിട്ടുണ്ട്. ഇവര് വെള്ളിയാഴ്ച ക്ലാസില്വന്നിട്ടില്ല. ഇവരുടെ രക്ഷിതാക്കളെ വിവരമറിയിച്ചിട്ടുണ്ട്. സംഭവത്തില് ഇവര്ക്കെതിരെ നടപടിയുണ്ടാകും. പരാതി ലഭിച്ചാല് പോലീസിന് കൈമാറുമെന്നും പ്രിന്സിപ്പല് അറിയിച്ചു. തനിക്ക് പരാതിയില്ലെന്ന നിലപാടിലാണ് കുട്ടി. സ്കൂളില് ഇത്തരം സംഭവങ്ങള് പതിവാണെന്ന് നാട്ടുകാരും ആരോപിക്കുന്നുണ്ട്.
അതിനിടെ ഉപ്പളയ്ക്ക് സമീപത്തെ ബേക്കൂര് സ്കൂളിലും സമാനരീതിയില് റാഗിങ് നടന്നതായി നാട്ടുകാര് ആരോപിച്ചു. ബേക്കൂര് സ്കൂളില് വിദ്യാര്ത്ഥിയെ സീനിയര് വിദ്യാര്ത്ഥികള് ചെരിപ്പുകള് കൈയില് തൂക്കി നടത്തിക്കുകയും നൃത്തം ചെയ്യിപ്പിക്കുകയുമായിരുന്നു. ഇതിന്റെ ദൃശ്യങ്ങളും പുറത്തുവന്നിട്ടുണ്ട്.
