സൗരയൂഥത്തിലെ ഏറ്റവും വലിയ ഗ്രഹമായ വ്യാഴത്തിന്റെ അന്തരീക്ഷത്തിന്റെ കൂടുതല്‍ വ്യക്തതയുള്ള ദൃശ്യം പുറത്തുവിട്ട് നാസയുടെ ബഹിരാകാശ പേടകം ജുനോ. വ്യാഴത്തിന്റെ അന്തരീക്ഷപാളികളുടെ ത്രീഡി ദൃശ്യമാണ് നാസ കഴിഞ്ഞ ദിവസം പുറത്തുവിട്ടത്. ചുഴലിക്കാറ്റുകളും മേഘങ്ങളും ആന്റി സൈക്ലോണുകളും നിറഞ്ഞ വ്യാഴത്തിന്റെ അന്തരീക്ഷം ഏത് രീതിയിലാണ് പെരുമാറുന്നത് എന്ന് വ്യക്തമാക്കുന്നതാണ് ചിത്രം.
ഇവിടെയുള്ള ചുഴലിക്കാറ്റുകള്‍ക്ക് പ്രതീക്ഷിച്ചതിനേക്കാള്‍ വിസ്തൃതിയുണ്ട്. ചിത്രത്തില്‍ ചുവന്ന നിറത്തില്‍ കാണുന്നത് ഗ്രേറ്റ് റെഡ് സ്‌പോട്ട് എന്നറിയപ്പെടുന്ന ഒരു ആന്റി സൈക്ലോണ്‍ ആണ്. ഗ്രഹം തിരിയുന്നതിന്റെ ദിശ അനുസരിച്ച് അവയ്‌ക്ക് ചൂടുള്ളതോ തണുപ്പുള്ളതോ ആവാം. ഈ ചിത്രങ്ങളിലെല്ലാം വ്യാഴത്തിലെ ഗ്രേറ്റ് റെഡ് സ്‌പോട്ട് ഏറെ വ്യക്തമാണ് .
ഗ്രേറ്റ് റെഡ്‌സ്‌പോട്ടിനെ കുറിച്ചുള്ള കൂടുതല്‍ വിവരങ്ങള്‍ ജുനോ ശേഖരിച്ചിട്ടുണ്ട്. ഒരു മൈക്രോവേവ് റേഡിയോ മീറ്റര്‍ ഉപയോഗിച്ചാണ് ജുനോ വിവരങ്ങള്‍ ശേഖരിച്ചത്. റേഡിയോ മീറ്റര്‍ ഡാറ്റയും രണ്ട് തവണ സമീപത്തുകൂടി പറന്നപ്പോള്‍ ശേഖരിച്ച ഗുരുത്വാകര്‍ഷണ വിവരങ്ങളും ഉപയോഗിച്ചാണ് ഗ്രറ്റ് റെഡ് സ്‌പോട്ടിന്റെ വിവരങ്ങള്‍ ശേഖരിച്ചത്.
വടക്കന്‍, തെക്കന്‍ അര്‍ദ്ധഗോളങ്ങളിലെ ഭൂമിയെപ്പോലെയുള്ള വായു സഞ്ചാരഗതിയും റേഡിയോ മീറ്റര്‍ വിവരങ്ങള്‍ കാണിക്കുന്നുണ്ട്. ഗ്രേറ്റ് റെഡ് സ്‌പോട്ടിനെ കുറിച്ച് ഇനിയുമേറെ വിവരങ്ങള്‍ അറിയാനുണ്ടെങ്കിലും വ്യാഴത്തിന്റെ അന്തരീക്ഷത്തിന്റെ സ്വഭാവം സംബന്ധിച്ച ഏറെ വ്യക്തമായ വിവരങ്ങള്‍ നല്‍കുന്നതാണ് ജുനോയില്‍നിന്ന് ലഭിച്ച ത്രീഡി ദൃശ്യം. വ്യാഴത്തെ കുറിച്ചുള്ള കൂടുതല്‍ രഹസ്യങ്ങള്‍ അറിയാന്‍ ഇനിയുമേറെ പര്യവേക്ഷണങ്ങള്‍ നടത്തേണ്ടതുണ്ട്.
വ്യാഴത്തിന്റെ ഘടന, ഗുരുത്വാകര്‍ഷണ മണ്ഡലം, കാന്തിക ക്ഷേത്രം, ധ്രുവ കാന്തിക മണ്ഡലം തുടങ്ങിയവയെ പറ്റി പഠിക്കാന്‍ 2011 ഓഗസ്റ്റ് 5 നാണ് നാസ ജൂനോയെ വിക്ഷേപിച്ചത്. ഈ ഗ്രഹം എങ്ങനെ രൂപപ്പെട്ടു എന്നതിനെ കുറിച്ചുള്ള സുചനകളെ പറ്റിയും ജൂനോ പഠിക്കും.
