കോഴിക്കോട് : നിര്മാണത്തില് ഇരിക്കവേ സ്ലാബ് തകര്ന്ന് വീണ് പരിക്കേറ്റ ഒരു തൊഴിലാളി കൂടി മരിച്ചു. തമിഴ്നാട് വില്ലുപുരം സ്വദേശി ഗണേഷ് ആണ് മരിച്ചത്. കോഴിക്കോട് തൊണ്ടയാട് ബൈപ്പാസിനു സമീപം നിര്മാണത്തിലിരുന്ന കെട്ടിടത്തിന്റെ കോണ്ക്രീറ്റ് സ്ലാബ് തകര്ന്ന് വീഴുകയായിരുന്നു.
ഗുരുതരമായി പരിക്കേറ്റ ഗണേഷ് കോഴിക്കോട് മെഡിക്കല് കോളേജ് ആശുപത്രിയില് ചികിത്സയിലായിരുന്നു. ഇതോടെ അപകടത്തില് മരിച്ചവരുടെ എണ്ണം മൂന്നായി. സെപ്റ്റംബര് 26നായിരുന്നു അപകടം. കെട്ടിടത്തിന്റെ മൂന്നാം നിലയില് ക്രെയിനുപയോഗിച്ച് സ്ഥാപിച്ച കോണ്ക്രീറ്റ് ബീം രണ്ടാം നിലയിലെ സ്ലാബിലേക്ക് വീഴുകയായിരുന്നു. താഴെ ജോലി ചെയ്യുകയായിരുന്ന അഞ്ച് തൊഴിലാളികള് തകര്ന്ന സ്ലാബിനുള്ളില്പ്പെട്ടു.
തിരുപ്പൂര് ആസ്ഥാനമായ നിര്മാണ കമ്പനിയുടെ നേതൃത്വത്തിലാണ് ഇവിടെ നിര്മാണ പ്രവര്ത്തനങ്ങള് നടത്തിയിരുന്നത്. അപകടത്തില് രണ്ട് പേര് അന്ന് തന്നെ മരിച്ചു. തമിഴ്നാട് സ്വദേശികളായ. കാര്ത്തിക്, സലീം എന്നിവരാണ് അപകട ദിവസം തന്നെ മരിച്ചത്. പരിക്കേറ്റ തങ്കരാജ് (32), ജീവാനന്ദം (22) എന്നിവര് ഇപ്പോഴും ചികിത്സയിലാണ്.
സംഭവത്തില് പോലീസ് കേസ് രജിസ്റ്റര് ചെയ്ത് അന്വേഷണം നടത്തുകയും ചെയ്തിരുന്നു. നിര്മാണ പ്രവര്ത്തനങ്ങള്ക്കിടയിലുണ്ടായ അശ്രദ്ധയാണ് അപകടത്തിന് കാരണമായതെന്നാണ് പ്രാഥമിക വിലയിരുത്തല്. സംഭവത്തില് 304 എ, 308 വകുപ്പുകള് ചുമത്തി പൊലീസ് എഫ്ഐആര് ഇട്ടിട്ടുണ്ട്. കെട്ടിട ഉടമയെയും, നിര്മാണ കമ്പനി അധികൃതരെയും കേസില് പ്രതി ചേര്ത്തിട്ടുണ്ട്. സംഭവത്തില് തൊഴില് വകുപ്പും അന്വേഷണം നടത്തുന്നുണ്ട്.
