ന്യൂദല്‍ഹി: കരിപ്പൂര്‍ വിമാനത്താവളത്തില്‍ വലിയ വിമാനങ്ങള്‍ അനുവദിക്കുന്ന കാര്യം രണ്ടു മാസത്തിനു ശേഷം പരിഗണിക്കുമെന്ന് വ്യോമയാന മന്ത്രാലയം. വിമാനത്താവളത്തിലെ സുരക്ഷ, മുന്‍കരുതല്‍, വികസനമടക്കമുള്ള വിശദമായ കാര്യങ്ങള്‍ പഠിച്ച ശേഷമായിരിക്കും തീരുമാനം. കരിപ്പൂര്‍ വിമാനാപകട അന്വേഷണ റിപ്പോര്‍ട്ട് പഠിക്കുന്ന സമിതി ഇക്കാര്യം പരിശോധിക്കും. സമിതി റിപ്പോര്‍ട്ടിന് അനുസരിച്ചായിരിക്കും തുടര്‍ നടപടി. വ്യോമയാന സെക്രട്ടറിയെ ഇതിനായി ചുമതലപ്പെടുത്തിയതായും വ്യോമയാന മന്ത്രാലയം അറിയിച്ചു. സര്‍ക്കാര്‍ ഇതിനായി ഒമ്പതംഗ സമിതി രൂപീകരിച്ചിട്ടുണ്ട്.
കരിപ്പൂരില്‍ എയര്‍ ഇന്ത്യ എക്‌സ്പ്രസ് വിമാന അപകടം പൈലറ്റിന്റെ വീഴ്ചയാണെന്ന് കണ്ടെത്തിയ സാഹചര്യത്തില്‍ വലിയ വിമാനങ്ങള്‍ക്കുള്ള നിയന്ത്രണം ഉടന്‍ നീക്കിയേക്കുമെന്ന് കരുതിയിരുന്നു. കഴിഞ്ഞ വര്‍ഷം വിമാന അപകടത്തിന് കാരണം റണ്‍വേയുടെ അപര്യപ്തതയാണെന്ന വിലയിരുത്തലിന്റെ അടിസ്ഥാനത്തിലാണ് വലിയ വിമാനങ്ങളുടെ സര്‍വീസുകള്‍ക്ക് അനുമതി നിഷേധിച്ചത്. വിമാന അപകടം നടന്ന തൊട്ടടുത്ത ദിവസമാണ് അനുമതി അധികൃതര്‍ റദ്ദാക്കിയത്. 2015ല്‍ റണ്‍വേ റീകാര്‍പ്പറ്റിംഗിനായും വലിയ വിമാനങ്ങളെ വിലക്കിയിരുന്നു. സൗദി എയര്‍ലെന്‍സ്, എയര്‍ ഇന്ത്യ എന്നിവക്കാണ് വലിയ വിമാനങ്ങള്‍ക്ക് കരിപ്പൂരില്‍ അനുമതിയുള്ളത്. ഇവ രണ്ടും സൗദിയിലേക്കാണ് സര്‍വീസ് നടത്തിയത്.
വിമാനത്താവളങ്ങളില്‍ കോവിഡ് നിയന്ത്രണം നീങ്ങുന്നതോടെ വലിയ വിമാനങ്ങള്‍ക്ക് അനുമതി ലഭിക്കുന്നത് പ്രവാസികള്‍ക്ക് ഏറെ ആശ്വാസമാണ്. കൂടുതല്‍ സര്‍വീസുകള്‍ വരുന്നത് വിമാന ടിക്കറ്റ് നിരക്ക് കുറയാനും കാരണമാകും.
