കെ.ആര്. മോഹന്ദാസ്
ശ്രീപരമേശ്വരന്റെയും പാര്വ്വതീദേവിയുടെയും പുത്രനാണ് ഗണപതി. ഗണങ്ങളുടെ നായകനായി പിതാവായ പരമശിവന് ഗണപതിയെ നിയമിച്ചു. അങ്ങനെയാണ് ഗണപതി എന്ന പേര് ലഭിച്ചത്. ഏതൊരു പ്രവര്ത്തി തുടങ്ങുന്നതിനു മുന്പും അതിലെ തടസ്സങ്ങള് ഒഴിഞ്ഞുപോകുന്നതിന് ഗണപതിഭഗവാന്റെ അനുഗ്രഹം തേടാറുണ്ട്. ഗണപതിയെ പൂജിക്കാതെ തുടങ്ങുന്ന കാര്യങ്ങള് പാതിവഴിയില് മുടങ്ങിപ്പോകുമെന്ന് ഭക്തന്മാര് ദൃഢമായി വിശ്വസിക്കുന്നു. ഇതിനെ സാധൂകരിക്കുന്ന ഒരുകഥ, കഥാസരിത്സാഗരത്തിലുണ്ട്.
താരകാസുരവധത്തിനായി സുബ്രഹ്മണ്യനെ സേനാപതിയാക്കാന് ദേവന്മാര് നിശ്ചയിച്ചു. ദേവേന്ദ്രന് മന്ത്രവിശുദ്ധമായ കലശമെടുത്ത് കുമാരന്റെ ശിരസ്സില് അഭിഷേകം ചെയ്യാന് തുടങ്ങിയപ്പോള് ഇന്ദ്രന്റെ കൈകള് സ്തംഭിച്ചുപോയി. ഇത് കണ്ട പരമശിവന് പറഞ്ഞു: ‘ഗണപതിപൂജചെയ്യാതെ തുടങ്ങുന്ന ഏതുകാര്യത്തിനും വിഘ്നമുണ്ടാകും.’ ദേവേന്ദ്രന് ഉടന് ഭക്തിപൂര്വ്വം ഗണപതിപൂജനടത്തി. വിഘ്നങ്ങള്മാറി സുബ്രഹ്മണ്യന്റെ അഭിഷേകവും നടത്തി.
ഗണപതിക്ക് ആനത്തല ലഭിച്ചതിനെക്കുറിച്ച് രണ്ട് വ്യത്യസ്തങ്ങളായ കഥകള് പുരാണങ്ങളിലുണ്ട്. ഒരിക്കല്, പാര്വ്വതീദേവി ശനിഗ്രഹത്തെ ഗണപതിക്കുകാണിച്ചു കൊടുത്തു. ശനിയുടെ ദൃഷ്ടിപാതമേറ്റ് ഗണപതിയുടെ ശിരസ്സ് ദഹിച്ചുപോയി എന്നും, തല്സ്ഥാനത്ത് ഒരു ആനത്തല കൂട്ടിയിണക്കിയെന്നുമാണ് ഒരു കഥ.
പാര്വ്വതിദേവീ മഞ്ഞള്കുഴച്ച് ഒരു കുട്ടിയുടെ രൂപമുണ്ടാക്കിയതുമായി ബന്ധപ്പെട്ടതാണ് മറ്റൊരു കഥ. മഞ്ഞള് കൊണ്ടുണ്ടാക്കിയ രൂപത്തെ പുത്രനായി സങ്കല്പിച്ച് ദേവി ജീവന് നല്കി. അതാണു ഗണപതി ഭഗവാനെന്ന് സങ്കല്പം. താന് സ്നാനത്തിനുപോവുകയാണെന്നും, ആരെയും പ്രവേശിപ്പിക്കാതെ വാതില്ക്കല് കാവല് നില്ക്കണമെന്നും ദേവി പുത്രനോട് പറഞ്ഞു. ഈ സമയത്താണ് ശ്രീപരമേശ്വരന് വന്നത്. കര്ത്തവ്യത്തില് അതീവജാഗ്രതയുള്ള ഗണപതി പരമശിവനെ തടഞ്ഞു. കോപിഷ്ഠനായ പരമശിവന് ഗണപതിയുടെ ശിരസ്സ് വെട്ടിക്കളഞ്ഞു. കോപം ശമിച്ചപ്പോള് ഒരു ആനത്തല പകരം കൂട്ടിയിണക്കി. ഇതാണ് കൂടുതല് പ്രചാരമുള്ള കഥ.
ചിങ്ങത്തിലെ വെളുത്തപക്ഷ ചതുര്ത്ഥിയാണ് ഗണപതിഭഗവാന്റെ ജന്മദിനമായ വിനായകചതുര്ത്ഥി. മോദകമില്ലാതെ വിനായകചതുര്ത്ഥി ആഘോഷങ്ങള് ഒരിക്കലും പൂര്ണ്ണമാവില്ല. ഗണപതിഭഗവാന് ഏറെ പ്രിയപ്പെട്ട മധുരപലഹാരമാണ് മോദകം. വ്രതശുദ്ധിയോടെ വിനായകചതുര്ത്ഥി വ്രതം എടുക്കുന്നത് അത്യുത്തമമാണ്.
വിനായകചതുര്ത്ഥി വ്രതം അനുഷ്ഠിക്കുന്നതിന് കൃത്യമായ നിഷ്ഠകള് നിഷ്ക്കര്ഷിക്കുന്നുണ്ട്. ചതുര്ത്ഥിയുടെ തലേന്ന് ഒരിക്കലെടുത്ത് വ്രതം തുടങ്ങേണ്ടതാണ്. മത്സ്യ-മാംസാദികള് പരിപൂര്ണ്ണമായും വര്ജ്ജിക്കണം. പകലുറക്കം ഒഴിവാക്കണം. ഭക്തിപൂര്വ്വം ഈ വ്രതം അനുഷ്ഠിക്കുന്നവര്ക്ക് അടുത്ത വിനായകചതുര്ത്ഥിവരെയുള്ള ഒരുവര്ഷക്കാലം സര്വ്വവിഘ്നങ്ങളും നീങ്ങി പ്രവര്ത്തനങ്ങളില് സര്വ്വൈശ്വര്യങ്ങളും ഗണപതിഭഗവാന് നല്കും.
ഭക്തിപൂര്വ്വം ഗണപതി പൂജനടത്തുമ്പോള് അത്ഭുതകരമായ ഫലസിദ്ധിയുണ്ടാവുമെന്ന് വിശ്വാസം. കര്മ്മശേഷിവര്ദ്ധിക്കുകയും, ചിത്തം സുസ്ഥിരവും ശാന്തവുമാകുന്നു. കുട്ടികള്ക്ക് പഠനനിലവാരം കൂടുതല് മെച്ചപ്പെടുന്നു. ആരോഗ്യവും ആത്മവിശ്വാസവും ധീരതയും കൈവരുന്നു. പ്രശ്നങ്ങളെ അഭിമുഖീകരിക്കാനും പരിഹരിക്കാനും പ്രാപ്തി ലഭിക്കുന്നു.ഭയാശങ്കകള് വിട്ടൊഴിയുന്നു. ഭൗതികവും ആത്മീയവുമായ പുരോഗതിയോടൊപ്പം, സാമ്പത്തികമായ ഉയര്ച്ചയും കുടുംബത്തിലുണ്ടാകുന്നു.
പ്രതികരിക്കാൻ ഇവിടെ എഴുതുക: