കോയമ്പത്തൂര്: നഗരമദ്ധ്യത്തില് ഓടിക്കൊണ്ടിരുന്ന എസ്യുവി കാറില് നിന്നും റോഡിലേക്ക് യുവതിയുടെ മൃതദേഹം വലിച്ചെറിഞ്ഞു. കോയമ്പത്തൂര് നഗരത്തിലെ അവിനാശി റോഡില് ചിന്നിയംപാളയത്ത് തിങ്കളാഴ്ച പുലര്ച്ചെയാണ് സംഭവം. റോഡില് വീണ മൃതദേഹത്തില് ഉടന് തന്നെ നിരവധി വാഹനങ്ങള് കയറിയിറങ്ങിയതിനാല് ആളെ തിരിച്ചറിയാനായില്ലെന്ന് പോലീസ് അറിയിച്ചു.
പോലീസ് ഇന്സ്പെക്ടര് മുത്തുമണിയും സംഘവും ഉടന് സ്ഥലത്തെത്തി മൃതദേഹം കോയമ്പത്തൂര് മെഡിക്കല് കോളേജിലേക്ക് മാറ്റി. തലയും മുഖവും വാഹനമിടിച്ച് തകര്ന്നതിനാല് ആളെ തിരിച്ചറിയാന് കഴിഞ്ഞില്ല. അര്ദ്ധനഗ്നയായ നിലയിലായിരുന്നു മൃതദേഹം. റോഡ് മുറിച്ചുകടക്കവെ വാഹനം ഇടിച്ച് മരിച്ചതാകാമെന്ന് പോലീസ് കരുതിയെങ്കിലും സ്ഥലത്തെ സിസിടിവി ക്യാമറ പരിശോധനയിലാണ് എസ്യുവി കാറില് നിന്ന് മൃതദേഹം വലിച്ചെറിഞ്ഞതായി കണ്ടത്.
സംഭവം കൊലപാതകമാണെന്നാണ് പോലീസ് നിഗമനം. മറ്റ് വിവരങ്ങള് പോസ്റ്റ്മോര്ട്ടത്തിന് ശേഷം ലഭ്യമാകുമെന്ന് പോലീസ് അറിയിച്ചു. അസ്വാഭാവിക മരണത്തിനാണ് കേസെടുത്തിരിക്കുന്നത്. മരിച്ച സ്ത്രീ ഏതാണെന്ന് തിരിച്ചറിഞ്ഞിട്ടില്ല. അന്വേഷണത്തിനായി രണ്ടു പ്രത്യേക സംഘത്തെ നിയോഗിച്ചിട്ടുണ്ട്.
